Ki khynnah ki dei ki nongsain dur ia ka lawei ka Ri

Ka ophis District Hub for Empowerment of Women (DHEW) jong ka tnat Social Welfare ryngkat ka jingiatreilang bad ka ophis District School Education Officer, West Jaintia Hills mynta ka sngi ka la pynlong ia ka jinglehkmen Children’s Day ha Auditorium hall ha Kiang Nangbah Government College, Jowai halor ka phang “For Every Child, Every Right”.  Bad kum shibynta kane ka sngi la pynkup burom ruh kumba 40 ngut tam ki khynnah skul kiba la poi shakhmat ha ka pule puthi kumjuh ha ka jingialehkai sports bapher bapher. Ha kane ka sngi lehkmen ka Vevotolu. Kezo, IAS, Sub-Divisional Officer (Sadar) Jowai ka la long kum ka kongsan, ryngkat ka jingdonlang ka Dr. Wa-i-Sa Sumer, District School Education Officer, Jowai, u H.Toi, Principal Kiang Nangbah Government College, Jowai, ka kong Y. Najiar, District Social Welfare Officer, ki nonghikai ki khynnah skul bapher bapher bad kiwei.

Ka Vevotolu. Kezo, IAS ha ba kren ka la ai khublei kyrpang ia baroh ki khynnah skul bad ka la iaroh ia ka nam ka burom ba ki la wanrah ha ka pule puthi ne jingialehkai sports. Ka la ong ka jingpynlong ia kane ka jingleh burom ka long ka lad ban ai mynsiem ia ki khynnah bad pynkynmaw ia ki khynnah ba kane ka jingjop kam pat dei kaba kut kumta ka kyntu ba kin bteng shuh shuh shakhmat bad don ia ka thong baheh.  Haba ka pynkynmaw ia ki kyntien u Jawaharlal Nehru kaba u ong “Ki khynnah ba mynta dei ki ban pynwandur ia ka lashai la shisngi”, kumta ka ban jur halor ka jingdonkam ban saiñdur bha ia ki khynnah ha baroh ki liang kynthup ruh ka pule puthi bad rukom im ba bha ba miat.

Ka la bynrap ruh halor ka jingdonkam ban kham pynlut bun ha ka jingiadei ban pynkiew ia ki khynnah ba mynta khang ba kin lah ban trei na ka bynta ka Ri.Haka jingiadei bad ka bynta jong ki longkmie longkpa, ki nonghikai ruh ka iaroh namar maki ruh ki don ka bynta ban pynwan dur ia ki khun ia ki khynnah skul ba kin heh kin san haka met ka phad bad bor jingstad jingshem phang.Ka la kyntu ruh ia ki khynnah skul ba kin long kiba shimkhia ban wanrah ka koit ka khiah haka met, ka bor pyrkhat ha ka mynsiem bad leh kaba bha tam ha kano kano ba la mut la mang.