Kum u kyrtong shimet rai ïakhun u Bah George ïa ka ilekshon MDC

U Bah George B Lyngdoh, MLA barim ka Umroi Konstituensi ha kane ka kynti u la mih syndon ban pynpaw ban aireng ha ka ileksion MDC ban wan kum u kyrtong shimet kata hadien ba la thaw ruh ia ka Umroi Democratic Front (UDF), ha Umroi ha ka jingialang kaba la long mynta ka sngi ha ka shnong Umroi Umdohbyrthih. Ia ka UDF la seng da ka jingiasngewthuh jingmut hapdeng u Bah George B Lyngdoh bad u Bah Albinus Lyngdoh, MDC barim ka Umroi Konstituensi ha kaba la ioh jingkyrshan ruh da ki spah ngut ki paid nongkyrshan na kane ka Konstituensi kiba da kawei ka jingmut ki la rai ban pynmih da u Bah George Lyngdoh ban iakhun ia kane ka ileksion kum u kyrtong shimet. Lah ban kdew, ba u Bah George B Lyngdoh u ba dei u wei na ki nongseng ia ka Umroi Constituency Progressive Forum (UCPF) u la hap ban weng noh na ka thup ban pan ticket hadien ba u Bah MD Syiem u la pan ia ka ticket hynrei u ba la shet noh ia ka UCPF ban pan ticket na ka Congress kaba la ai ruh ia ka ticket ha u bad pynduh ticket pat ia u Bah Albinus Lyngdoh, dei hadien katto katne sngi pat da ha ka 16 tarik Kyllalyngkot ka UCPF ruh ka la rai ban khylliap lama noh bad ban leit ai jingkyrshan ia u Bah MD Syiem u kyrtong ka Congress.

Haba kren bad ki Nongthoh Khubor, u Bah George B Lyngdoh, u la iathuh, ba ka jingthmu hi jong u ban mih ban aireng ha kane ka ileksion MDC 2025 ka long hi ban shakri ia u paidbah bad ban peit ruh ia ka kawei jong ka Umroi Konstituensi, da kaba pynpaw ruh ia ka jingsngewnguh kaba khraw ia ki paid nongkyrshan kiba da kawei ka jingmut ki la pdiang ia kane ka rai hadien ba u Bah Albinus lem bad ma u ki rai ban ia treilang ha kane ka ileksion MDC kaban sa wan.

U la iathuh ruh, ba ka jingshet kylla u Bah MD Syiem ia ka UCPF u ba la leit pan ticket noh na ka Congress  bad pynduh ticket noh ia u Bah Albinus kumta halor kane ka nongrim ba kim shem ia hap shuh ia ka jingpynshad shrieh ia u paidbah kumta, ki la rai ban iatreilang noh ha kane ka ileksion MDC kaban sa wan. Hadien ba la pynskhem ia ka rai ban mih iakhun kum u kyrtong shimet na ka liang u Bah George B Lyngdoh lem bad u Bah Albinus Lyngdoh ki la pan ka jingkyrshan kaba radbah na ki paidbah nongkyrshan jong ki ban pynjop don burom bad ban poi sha ka thong ha kane ka ileksion kaban sa long ha u bnai Rymphang.