Kurup ka ANTF ïa u drok ba shongdor T.55 lak

Ka Anti Narcotics Task Force (ANTF), hynnin ka sngi kala leit khynra ia ka iingsah jong uwei u snar nongklhaii drok uba la tip kum u Rahul Chhetri ha Lower Rynjah, Shillong.
U Superintendent of Police (SP) ka ANTF, Meghalaya, u Vikash Kumar, ula pyntip ba ha katei ka jingleit khynra ha ka iingsah jong u Rahul Chetri katkum ki kyndon jong ka NDPS Act kila ioh kurup ia u drok uba shongdor palat T. 55 lak bad la suba jur ba une u drok u lah ban dei jong ka kynhun nongkhaii droks kiba na kawei pat ka Jylla.
Ha kane ka jingkhynra, la ioh kurup haduh 2060 tylli ki dawai kuli Nitrazepam, kiba shongdor T.8.24 lak ha ki ïew be-aiñ, 23 tylli ki synduk sabon ba la thep ia u drok uba don ia ka jingkhia kaba 237 gram uba shongdor haduh T.47.4 lak bad song pisa kaba T.27,300.
U SP ula pyntip ba u Rahul Chettri ula ioh ban phet krad da ka kali Maruti Ertiga kaba don ia u numbar ML10-B-5347 mar ia poi ki pulit bad haduh mynta u dang phet rieh.
Ula pyntip ba kila don Arngut ki briew kiba la shah kem haba iadei bad kane ka jingjia bad kidei kiba donkti ha ka kam kaba iar jong ka jingkhaii be-aiñ ia u drok na kawei ka jylla sha kiwei pat bad ka kynhun jong ka ANTF ka dang iaid shakhamt ha kaban tohkit bniah ia kiba donbynta ha kane ka kam be-aiñ.
U SP ula kyntu ba lada ki don kino kino ki briew kiba don ia ki jingtip shaphang jong utei u briew uba la phet rieh, kiba iadonbynta lang bad u ne kino kino ki runar kiba donkti ha ka kam khaii drok, ki lah ban ai ia ki jingtip sha ka Meghalaya ANTF bad yn buhrieh ia ka kyrteng ne ia ka jingtip shaphang ka jongki bad yn ai khusnam ruh kine kiba mih shakhmat ha kaban ai jingtip.