Kut tamasa Cherry Blossom hapdeng ka jingsahnud

Ka tamasa Shillong Cherry Blossom ba-ar sngi, ka la kut ha ka sngi Saitjain ha kaba ki nongrwai bad ki kynhun tem ki la pynshongshit ia ki hajar ki paidbah ba ieit jingrwai kiba la wan sakhi ha kane ka tamasa ha madan Jawaharlal Nehru Stadium Polo, Shillong. Ha kine ki ar sngi ka tamasa ki nongrwai bad nongtem nabar ri ki la pynbyrngia ia ki paidbah kumjuh ki samla na jylla ki la ioh lad ban pyni ia ka sap ka phong, ha kane ka tamasa la pyninam ia ka jingriewspah ka kolshor kum ka lad ban kyntiew ia ka kamai kajih bad ka kam jngohkai Ha kine ki ar sngi ka tamasa da ki hajar ngut ki paitbah ki la tuid sha ka JN Stadium bad ka Cultural Arena ba la don ha kylleng ka Shillong, ia kaba plie u Myntri Rangbah ka jylla u Conrad K. Sangma ha ka 14 tarik u Naiwieng. Ha ka sngi nyngkong, la pynbyrngia da ka nongak phlim Bollywood ba pawnam ka Nora Fatehi kaba la pynshongshit ia ki paitbah ka ka jingtem pawnam ‘The Script’, kaba ki paitbah ki la iarwai lang ia ka jingrwai “Hall of Fame” bad la pynkut ia kane ka tamasa da u nongrwai Pop ba pawnam u Jason Derulo.

Ha ka sngi ka baar, ia ka tamasa la sdang da ka nongrwai ba pawnam ka jylla ka Meba Ofilia bad hadien kane, kala don ka jingpyninam bad jingpynsngewtynnad na ka Japan’s Drum Tao bad DJ Kennedy bad la ioh ruh ia ka jingrwai kyrpang ban kynmaw burom ia u nongrwai ba pawnam ka ri u Zubeen Garg ha kaba bun na ki nongpeitkai kila ia rwai lang ia ka jingrwai ‘Mayabini’. Ka kynhun rwai bad tem ba pawnam ka Aqua ka la pynbyrngia bad pynlong ia ki paitbah ban shad ia ka jingrwai “Barbie Girl,” katba u nongrwai hip-hop u Tyga ula pynshongshit ia ki paitbah da ka jingrwai “Swish,” “Dip,” bad “Ayy Ladies” bad la pynkut pat ia kane ka tamasa da u Diplo, uba la pynkylla ia kane ka madan kum ka jaka shad lyngba ki jingtem DJ ka jong u. Nalor ka rynsan jong ka tem ka put, ka la don ruh ka jingpynsngewtynand ia ki paitbah da ka jingpyninam ia ka Cosplay, ka jingbuh ia ki dukan bam ki bapher bapher, ki jingthain kti bad kiwei kiwei kum ka jingpyninam ia ka jingriewspah ka kolshor ka jylla. Ki kynhun kiba la ioh iashim bynta ha ka tamasa ki dei ruh kiba la ioh ban pyni ia ka sap ka phong lyngba ka jingkyrshan ba ki ioh na ka CM Meghalaya Grassroots Music Project (MGMP).

Katba ka Japan Arena ha Ward’s Lake ka la plie lad ia ki nongwankai ba kin sakhi ia ka kolshor ba kyrpang, ki jingpyninam bapher bapher, ki jingdro bad kiwei. Hapdeng ka jingshongshit ki paitbah ha ka tamasa Cherry Blossom, ki paitbah ki la ioh lad ban iakynduh bad ban ia shondur lang bad u Myntri Rangbah ka jylla u Conrad K Sangma uba la leit jngoh ia ki Arena ne ki jaka kiba la pynkhreh ban pynsngewtynnad ia ki paidbah ha ka tamasa.U Myntri Rangbah ula pynlut por shikynta ban leit jngoh ia ki jaka pyninam ha ka tamasa bad ha ka por mynmiet ula leit ha ka jaka “Fan Pit” ban sakhi bad ia kmen bad ki paidbah ba wan ha ka tamasa.