Ha Law Kyntang rakhe ka ZSI ia ka Janjatiya Gaurav Divas

Ka Zoological Survey of India (ZSI), North Eastern Regional Centre, Shillong ryngkat ka jingiatreilang bad ka Department of Zoology, College of Science & Commerce (CSC), Mawphlang ha ka sngi Saitjaiñ ki la pynlong ia ka prokram ha Law Kyntang, Mawphlang ban rakhe ia ka Janjatiya Gaurav Divas bad ruh ban kynmaw burom ia ka lyngkhuh sngikha kaba 150 snem jong u Bhagwan Birsa Munda. Ha kane ka jingrakhe la wan ban iashim bynta palat 100 ngut kaba kynthup ia ki nongshong shnong, ki nongialam shnong, ki kynhun jong ki samla, ki nonghikai bad ki samla pule.

U Lyngdoh ka Hima Mawphlang u Bah C.A. Lyngdoh ula plie ia kane ka jingrakhe kum u Kongsan ha ryngkat ka jingdonlang u Rangbah Shnong ka Mawphlang u Bah J. Kharkongor (Principal, CSC Mawphlang), Dr. Saipari Sailo (Scientist D, ZSI Shillong), ki nonghikai jongka College of Science & Commerce bad kiwei kiwei. Ki nongkren ha ka jingialang kila pynpaw ia ka jingkongsan jongka Janjatiya Gaurav Divas kadei ban ai burom ia ki jingriewspah ka kolshor bad ka riti dustur tynrai jong ki jaidbynriew riewlum hapoh ka ri India, da kaba ai jingithuh ia ka jingstad bad jingshemphang jong ki riewlum bad ruh ia ka jingnoh synniang ka jong ki ha kaban tei ia ka ri India baroh kawei.

Nalor kane, kila pynpaw ruh ia ka jingkongsan jong ka Law Kyntang ba ka dei ka jingleh jong ki pateng ki barim kaba dang im haduh mynta bad ka bynta kaba kongsan bha ha kaban pynneh ia ka jingdon jingem jong ka mei mariang. Hadien jong ka jingialang la pynbud pat sa ia ka jingiasyllok bad ki nongshong shnong da kaba pynleit jingmut ha kaba iadei bad ka kolshor, ka jinglong kongsan jong ki sawdong sawkun jongka Law Kyntang bad ban shim lang ia ka jingkitkhlieh ban iada ia ki jingriewspah jong ka mei mariang na ka bynta ki pateng ban wan.