Hapdeng ka jingiphuh kut ka shad Behdeiñkhlam ka Seiñraij Ialong

Ka shad niam Behdeiñkhlam jong ka Seiñraij Ialong, West Jaiñtia Hills District kaba kynthup ia ka Raij Ialong, Raij Wahiajer bad Raij Nongkyllep kala poi sha kaba kut mynta ka sngi hapoh ka syiem Aitnar jong ka shnong Ialong daka jingshim bynta shongshit ki khun ka Raij haka jingstad jingkynhoi risa ryngkat ki sur ka bom ka bhuri, kumjuh ruh ka jingwanrah iaki rong ki rot ha Aitnar ryngkat ki khubor sha u paidbah bad ka imlang sahlang.
Nalor u paidbah ba bun la wan sakhi lang ruh ia kane ka Behdeiñkhlam da u Dy.CM ka sorkar Jylla u Sñiawbhalang Dhar kum u kongsan, u myntri ka tnat ka koit ka khiah bad sports u Wailadmiki Shylla kum u symbud kongsan ha ka jingdonlang ki MDC ka JHADC ba kynthup u Dy.CEM Lasky Rymbai, u EM Moonlight Pariat bad u Reformingson Lamare.
Nangta u Dolloi ka Elaka Jowai u Puramon kynjing, u Dolloi Elaka Nangbah u Moonlight Garod, ki khlieh nongialam jong ka niam, jong ka raij naki Seiñraij bapher bapher bad kiwei.
Kumba ka thong jong kane ka Behdeiñkhlam ka long ban beh iaka khlam, ka pang shitom bad jingsniew ba bunjait haka imlang sahlang, nalor ban ainguh aidem ruh ia u Blei trai kynrad ba un theh jingkyrkhu ha baroh ki liang, kumta naka liang u Sñiawbhalang Dhar bad u Wailadmiki Shylla ruh haba kren ki shim ka lad ban ai khublei Behdeiñkhlam basuk bakmen ia baroh ki khun ka Raij ba kin ioh iaka koit ka khiah bad kyrkhu kyrdoh.
U Wailadmiki Shylla u ong, mynshwa kane ka Aitnar ka long kaba btuit naka daw ba jur ka ktieh, ha une u snem pat ym don shuh ka ktieh ba btuit, ka daw dei bala poi ka roi ka par bad bala shna pynbha ia kane ka jaka.
U ong ruh ba ka shnong Ialong ka dei hok hi ban ioh iaka roi ka par kumba la iohi iaka jingkylla dur jongka mynta, ka daw namar ba dei ka shnong ba khampher bad kaba ieid iaka roi ka par. U ai khublei ruh ia u Dy. CM Sñiawbhalang Dhar naba u dei ba hakhmat ban iasaid iakren haka sorkar haka jingiadei bad ka jingioh iaka roi ka par hapoh Rilum Jaiñtia.
Kumta halor ka roi ka par ba maki kum ki nongmihkhmat kila dep ban wanrah, u kyntu naduh kiba wan peitkai kumjuh ki trai shnong ba ka kamram jong ki pat ka long ban sumar ban pynbha pynmiat, bad ban pynkhuid ia kiei bala ioh.
Na ka liang u Sñiawbhalang Dhar u sngewkmen ban iohi ia ka jingkhuid bad jingkylla ka shnong Ialong na ka jingwan ka roi ka par ha ka jingiadei bad ki lynti syngkieng kumjuh kane ka Aitnar ba juh pyndep ia ka shad niam Behdeiñkhlam manla u snem.
U iaroh ruh ia u Wailadmiki MLA ka thaiñ naba u long uba shimkhia bha ban leit iakren bad kiba bor ba hakhlieh ka sorkar naka bynta ka jingmyntoi bad jingdonkam u paidbah.
U la ai khublei ruh ia u CM Conrad Sangma, Dy CM Prestone Tynsong ba lyngba jong ki tuid ka roi ka par ha Rilum Jaiñtia.
Ha kajuh ka por u ai khublei kyrkhu kyrdoh ruh ia baroh ki khun ka Raij da kaba khmih lynti ba kin nangphuh nangpheiñ naki snem sha ki snem haki liang baroh, bad kumba kiew haka kyrdan kin nangkiew ruh haka jingieid iaka niam ka rukom.