Kylla dpei ka iing ha shnong Tiniang na ka jingthang niut

Ka jingwiang ding klumar ki briew khlem da pyrkhat ia kiwei pat ki para briew bad ki jingthaw ba im, ka la wanrah ia ka jingshah pynjot ia kawei ka iing hapoh ka shnong Tiniang na ka jingpur stet jong ka ding ba klang kaba la bamduh lut ia kawei ka iing lem bad ki jingdon jingem. Kane ka la jia mynta ka sngi ka 14 tarik u Rymphang 2025 ha ka por kumba12 baje ei ei nohphai sngi ha kaba kawei ka ïingbriew ha ka shnong Tiniang ka la shah bam duh ha ki thylliej ding kaba la klang bha bad kane ka ding ka la pur jan baroh kawei ka shnong Tiniang hynrei donbok ba la lah ban tem noh ia ka ding ba klang na ka jingwan poi jong ki kali pynlip ding na ka tnad Fire and Emergency Service. La ioh jingtip ba katei ka ïing kaba la ing kadei jong ka kong Joliana Nongsiej kaba dei napoh ka shnong Tiniang, West Khasi Hills.

U sordar ka shnong Tiniang u Bah Kyrshanbor Marshiangbai, u la ong ba u la lap ia katei ka jingjia pluh ding katba u dang wan na Nongstoin ha kaba u la ïohi ba ka shnong baroh kawei ka la shu tdem lut pui ymlah shuh ban ïohi ei ei bad haba u la lum jingtip la shem ba tang kawei ka ïing kaba la ing hynrei baroh ki jingthung jngtep bad ki dieng ki siej ba la sumar khnang ki la ing lut khoit. Na ka liang u sordar u la kyntu ïa ki paidbah ban sumar bad phikir bha na ka ding  ha kum kane ka aïom tyrkhong, ha kajuh ka por u la maham ruh ïa ki briew ba kim dei ban leh khlem akor bad ba ki dei ban da phikir, khnang ban lait na ki jingsngewsih namar ka jingpluh ding ha katei ka shnong ka ju jia man la ka por.

Na ka liang jong uwei u rangbah nongshong shnong ula iathuh ba u la ïohi ba nyngkong eh kadei tang na ka daw ba la don kiba thang ñuit pynban kyndit kynsan ka thylliej ding ka la kem ding kynsan sha ki bynta jong ki phlang sañium bad ka la pur baroh kawei ka shnong.