Kynduh ka NPYF ia u CEM, kyntu ban tuklar ia ka OM ka sorkar pdeng

Ka National People’s Youth Front (NPYF) Meghalaya hynne ka sngi ka la leit iakynduh ia u Chief Executive Member ka Khasi Hills Autonomous District Council (KHADC) u Bah Shemborlang Rynjah ban kyntu ia ka Council kan shimkhia mardor halor ka jingpynmih ka sorkar pdeng ia ka Office Memorandum (OM) ban plie lad ia ki ban ioh tih ia u Uranium namar ba kin ym donkam shuh ban pynlong ia ka Public Hearing ne ban sngap ia ka sur jong u paidbah. Ka NPYF hapoh ka jingialam u Working President Bah Bajop Pyngrope ki la pynpaw ia ka jingsngewkhia halor katei ka OM ba la pynmih da ka Sorkar India lyngba ka Ministry of Environment, Forest and Climate Change ha ka 8 tarik mynta u bnai, ha kaba ym donkam shuh ban pynlong ia ka Public Hearing ne jingsngap ia ka sur u paidbah lada donkam ban tih ïa ki Atomic Minerals ne ki mar poh khyndew kiba lah ban thaw nukliar kum u Uranium.

Kum ban shu kdew, ha ka Office Memorandum ka MoEFCC ka la pynbna ban pyllait ia ka jingpynlong ia ka Public Hearing ne ka jingsngap ia ka sur u paidbah lada tih ïa ki marpoh khyndew hapoh ka Part B (Atomic Minerals) bad Part D (Critical and Strategic Minerals) jong ka Mines and Minerals (Development and Regulation) Act. U Bah Bajop ula iathuh, ba ka NPYF ka la kyntu ïa u CEM ban tuklar mardor ia katei ka OM bad kyntu ia u CEM ban pyndonkam ïa ka bor ba la pynkup hapoh ka Sixth Schedule ka riti synshar ka ri ban shim ki lad ban pyrkhing ban ym plie lad ban ioh tih ia u Uranium ba don hapoh ka jylla khamtam hapoh u pud u sam jong ka Council.

U nongialam ka NYPF ula pyntip ba na ka liang u CEM ula kular ban shimkhia mardor bad shen un sa lum jingialang bad ki heh ophisar jong ka KHADC ban iatai sani ban shim ia ka rai, kaei kin leh nangne shakhmat.