Kynnoh ai CoV sop sop ka sorkar, ioh shong dukan ki bym dei ha MUDA

Ki katta katne ngut ki nongdie madan hynne ka sngi ki la shong kyllain mungor ha ryngkat ki Pla Card ha Khyndai Lad. Kane ka jingshong kyllain mungor ki nongdie madan ha Khyndai Lad ka long ban dawa na ka Shillong Municipal Board (SMB) ban ai noh ia ki syrnod Certificate of Vending (CoV) sha kito ki bym pat ioh. Lah ban kdew ha ka 6 tarik Nailar u CEO ka SMB ula lum ia ka jingialang jong Provisional Town Vending Committee (PTVC) ban iakren halor kane ka mat. Hadien ka jingialang ka kynhun Shillong Roadside Hawkers Association (SRHA) ka la pynpaw ba ka hun ia ka jingialang ba la lum u CEO ka SMB hynrei ka la pynpaw ruh ba ki don kumba 40 ngut ki nongdie madan ki bym pat ioh CoV. Na ka liang ka Adviser jong ka Meghalaya & Greater Shillong Progressive Hawkers and Street Vendors Association (MGSPHSVA) ka Kong Angela Rangad ka la kynnoh ba kane ka jingpynslem ka SMB ban ai CoV ia ki nongdie madan ka dei namar ba ka (SMB) ka kwah ba ki nongdie madan kin iap thngan.

Ka Kong Angela ka la iathuh ka jingialang jong ka PTVC ha ka 6 tarik, ki nongdie jingdie madan ki la kyntu ia u CEO ban pynsted ka jingai CoV namar ki nongdie madan mynta ka shibnai tam, ki khlem ioh ban kamai hadien ba la shah weng noh na Khyndai Lad. “Ha ka jingialang ngi ka kyntu ia u CEO ban khot kyrkieh ia ka jingialang ban ai noh ia ki CoV hynrei u CEO ula ong pynban ban thaw da ka Sub-Commiittee ban iakren halor kane ka mat” la ong ka Kong Angela bad ka la kam ruh ba ki don sa kumba 60-70 ngut ki nongdie jingdie madan ki bym pat ioh CoV bad ki don ruh ki bym shah kynthup ha ka por wan leh sorjamin (Survey) da ka SMB. Ki longkmie ba wan rah plakad hynne ka sngi ki la iathuh ba mynta la kumba 1 bnai ki la duh ban shong die jingdie namar ba kim pat don ia ka CoV bad ka sorkar ruh kam shah ia ki ban shong hapoh MUDA. “Ki bym dei hok ban ioh ia ka COV ki ioh shong shapoh MUDA, katba ma ngi ba dei hok pat ioh haduh mynta” ki la ong.

Ki la kynnoh ka sorkar ka ai COV sop sop ia ki briew, namar ki bym dei ban ioh shong shapoh MUDA ki ioh shong dukan katba ia ngi kiba dei hok ym ioh shong dukan. Ka la iathuh ba ki la leit ban mih man ka por sha Ophis ka SMB halor ka jingbym ioh ia ka COV hynrei na SMB pat ki phah sha u Bah Paul, u Bah Paul pat u phah sha u Bah Khain bad ki shu phah kyllaiñ jalabi, da kaba bynrap ba kumno ki shu phah kyllaiñ ia ngi ban leit nawei shawei. Ka Municipal ia ki briew ba ka mon ka ai COV ia ki bym mon pat kam ai.Ki la dawa ruh ba ka sorkar ka dei ban iathuh ia ka daw ba balei kim ai ia ka COV ia ki, namar la 1 bnai mynta ki la leit ban iakynduh ia ki nongpyniaid ki shu ong beit ban ap ynda la don ka jingialang, hynrei mynta ynda la dep ka jingialang ruh kim pat ai ia ka COV.”Namar ba ka jingiakynduh ruh ka la kut. Ngin ap sa lano kata ka jingialang, ki jingkular kim shym poi shaei shaei. Kumta ngi sa mih ban pynlong noh da ki jingiakhih” la bynrap ki nongshong die madan.