Kyntait u Bah Metbah ba don ka jingiapher jingmut hapoh ka Party

U President ka United Democratic Party (UDP) uba dei ruh u Myntri Sorkar u Bah Metbah Lyngdoh u la kyntait ia ki jingkynnoh ba don ka jingiapher jingmut hapoh ka Party, da kaba ong ba u dei u briew u bym don jingshun iano iano ruh hynrei u pynleit jingmut ha ki jingiatai hapoh ka iing dorbar thawain.

Kane ka wan hadien ba mih ki jingkynnoh ba ka lah ban don ka jingiapait iapra hapoh ka UDP khamtam namar ka jingshim bynta u MLA ka UDP na Shillong West u Bah Paul Lyngdoh ban shim bynta ban kylli jingkylli ïa u Bah Metbah Lyngdoh u Myntri ka tnat Bording.

Haba kren sha ki lad pathai khubor, u Bah Metbah ula ong, “Kam don eiei kum kata na ka liang jong nga. Ha ka jingshisha nga long uba khuid mynsiem bad u kren beit iaka jingbha. Kaei kaei kaba ngi iakren hapoh ka iing dorbar ka noh synniang sha ka bha ka miat jong ki paidbah ka Jylla.”

Haba kylli shaphang ka jingkynnoh ba don ka jingbym ïa sngewthuh jingmut, u President ka UDP u al ong “Kaei ka jingbym ïa sngewthuh jingmut ne jingia sngewthuh bakla bad balei phi kylli ïa kata ka jingkylli? Ngam don ei ei ban ong. Nga long uba khuid mynsiem bad u kren beit iaka jingbha”.

U Bah Metbah u la ban jur ia ka jingdonkam ban pynneh ia ka jinglong kaba tei hapoh ka iing dorbar da kaba ong, “Nga la kdew mynta ka sngi ha ka iing dorbar ba baroh ki mat bad ki mat ba la pynpaw da ki dkhot la shim khia bad ngin sa shim khia katkum kata ha ka por kaba biang, hynrei nga la ïohi ïa ki baroh ki MLA ki ju ïasam ïaki jingai jingmut kaba bha”.

“Lada ngim ïakren ne ïa kylli jingkylli hapoh ka Iingdorbar, te haei ngin ïakren ne ïa kylli jingkylli, ha Iew Laitumkhrah, Motphran ne Khyndai Lad” u la buh jingkylli.

“Ngi dei ki nongmihkhmat, kumta ngi dei ban leh kum ki nongmihkhmat. Haba ngi don hapoh ka iing dorbar ngi dei ban shim beit ia kano kano ka kam da ka jingmut kaba tei”, u la bynrap.