Kyntait u Myntri ban thung kynhun tohkit halor ka jinglut ban shna ia ka Ganol Power Project

U Myntri ka tnat Bording u AT Mondal hynne ka sngi ula kyntait ia ka jingdawa u Nongialam ka Liangpyrshah u Dr Mukul Sangma ban thung da ka kynhun tohkit halor ka jingkiew ka mang tyngka ban pyndep ia ka Project pynmih bording ka Ganol Hyndel Power Project. Haba kren sha ki lad pathai khubor u Mondal ula ong, ka jingkiew ka bai lutksan ban pyndep ia ka Ganol Hydel Power Project la dep ban bishar bniah shwa da ka IIT Guwhati bad la mynjur ruh da ka ophis ba la ithuh da AG ka Jylla. “Ngam ïohi ba kan don kano kano ka jingleh tuh ban pynkiew ia ka bai lutksan ban pyndep ia ka Ganol Hyndel Power Project. Ha kano kano ka Project pynmih bording, la ka dei ha Meghalaya ne ha kano kano ka Jylla ka ri, ka jingkiew ka bai lutskan kan don beit hynrei hashuwa ban mynjur ia ka dor, hap donkam ban phah eksamin shwa ha ki bor ba laitluid bad na ka bynta ka Ganol la phah leh ha ka IIT Guwahati” la ong u Mondal.

Haba kylli halor ka jingkiew ka bai pyndep ia ka Ganol, u Myntri ula ong, ba hapdeng ka jingpyntrei ia ka Project ka la don ka jingpynkylla ia ki kam khamtam ia ki Design jong ka dam bad ka rukom pyntuid ia ka um sha ki kor (Turbine) pynmih bording. U Mondal u la ong ba ka CWC jong ka Sorkar Pdeng ka la ai jingmut ba donkam ban shna da ka tunnel ban pyntuid ia ka um sha ki Turbines bad kane ka dei kawei ka nuksa ba don ka jingpynkylla ia ki jingtei wat hapdeng ka jingpyntrei ia ka Project.

“Wat la ngi la pynkiew ia ka bai lut ban pyndep ia ka Ganol, Ia ka jinglut la phah bishar bniah shwa sha ka IIT Guwahati hadien kata la bishar ruh da ka ophis ba la ithuh da AG ka Jylla bad ia ka jingtyrwa la rah sha ka jingialang kynhun Myntri Sorkar kaba la ai jingmynjur ia ka jingtyrwa” u la ong. U Myntri u la pynksan ba ka jingpynkiew ia ka bai lut ban pyndep ia ka Ganol kan don hi ka jingktah ha ka pisa pilain hynrei kane ka jingpynkiew ia ka jinglut ka iarap ruh ban pynjlan ia ka rta jong ka Ganol Hyndel Power Project ka ban ai jingmyntoi ia ki paidbah bad Jylla baroh kawei.