Ujor ka JSU sha ka DMHO bym wan trei ki Doctor ha Pdengshakap PHC

Ka Jaintia Students Union Syndai Unit (JSU) hynne ka sngi ka la leit iakynduh ia ka District Medical & Health Officer jong ka West Jaintia Hills District Jowai ban iakren halor ki 3 tylli ki mat jingdawa jong ka seng halor  kaba iadei bad ka Pdengshakap Public Health Centre (PHC). Ka JSU Syndai Unit hapoh ka jingialam u President u Samla Pynshailang Suliang ka la dawa na ka DMHO ba ka dei ban shimkhia halor ka jingbym wan trei ki doctor ha ka sngi saitjaiñ ha ka PHC Pdengshakap. Ki la pynapw ba ka jingbym wan trei tista ki doctor khamtam ha ka sngi saitjaiñ ka pynjynjar shibun ia ki paidbah nongshong shnong kiba hap hapoh ka jingpeit jingkhmih jongka PHC Pdengshakap khamtam ia u duk u suk bad ka seng ka dap da ka jinglyngngoh ba ki doctor ki kheiñ sting ia ka pang ka shitom jong ki paidbah.

Nalor kane ki la pynpaw ruh ia ka jingduna ki dawai dashin ha PHC bad ha ki Sub Centre bad kila dawa ba dei ban pynbiang ia ki dawai dashin ha PHC bad ha ki Sub Centre kiba hap hapoh jong ka PHC Pdengshakap khnang ba kan long ka jingmyntoi ia ki nongpang kiba duk ba suk. Ka JSU kala dawa ruh ba ki Doctor ki hap ban leit jngoh shisien shi taiew ia ki 2 tylli ki Sub Centre kiba kynthup ia ka Syndai Sub Centre bad ka Tranglang Sub Centre khnang ban pynsuk ia ki paidbah khamtam ruh ia ki riew tymmen kiba la noh ka rta ki bym lah shuh ban shong kali jngai bad ruh ban don ia ka jingiadei kaba iajan bad u paidbah. 

Ka JSU kala pynpaw ruh ia ka jinglyngngoh ba ki ha ka por ba ka don ka jingsaphriang jong ka khlam COVID-19 ki doctor ki leit jngoh man la ka por hynrei mynta pat kim lah satia ban leit jngoh ia kine ki jaka ai jingsumar. Ka JSU ka la leit buh ia kine ki mat jingdawa, ka dei hadien ba ka la leit jurip ia ka Pdengshakap PHC ha ka 21 tarik u Jylliew 2025.