La pynbeit ïa ki jingeh ki College ban ïasoh bad ka State University

U Myntri ka tnat Pule Puthi u Rakkam Sangma u la pynshai ba ka jingphah sangeh ban pyniasoh (Affiliate) iaki College bad ka Captain Williamson Sangma State University kadei namar ba ki College ki hap ban weng shwa iaka jingiasoh (Disaffiliate) ialade naka skulbah North Eastern Hills University (NEHU). Kane ka wan hadien baka Captain Williamson Sangma State University kala pynsangeh noh ia ka jingpyniasoh (Affiliation) bad ki 22 tylli ki College da kaba ai daw ba kila don ki jingthud kiba la mih na ki kyndon ain kiba la don lypa jong ka NEHU.

Haba kren shaki lad pathai khubor u Rakkam u la ïathuh ba naka liang ka Tnat Pule Puthi lyngba u Commissioner kala lum ka jingïalang bad ka NEHU bad haka jingïalang la pynbeit iaki jyrwit jyrwat hynrei ki College ki dang donkam ban bud iaki katto katne ki kyndon hashuwa ban ioh ka jingithuh naka State University. U Rakkam u la ïathuh ba ki kyndon ain jong ka NEHU Act ki kdew shai ba ki College kim lah ban ioh jingithuh na artylli ki skulbah (Dual Affiliation) namar kata kito ki College kiba la pyniasoh (Affiliate) bad ka State University ki donkam ban ioh jingbit shwa (No Objection Certificate) naka NEHU.

“Kita ki College ki hap ban Apply ban nym iasoh shuh (Disaffiliate) bad ka NEHU bad hadien kata kin sa Apply ban pyniasoh (Affiliate) bad ka State University” la ong u Rakkam. U Myntri u la ïathuh ba haduh mynta kumba 10-12 tylli ki College kila pyniasoh bad ka State University naka bynta ban sdang pynrung Class noh haki 15 tylli ki Department (Humanities). U la ïathuh ba haduh mynta kito ki College kiba la pyniasoh bad ka State University kin ioh jingithuh naka State University tang ban sdang iaka First Semester hynrei kiwei ki Semester kiba dang sah yn dang hap iaid hi lyngba ka NEHU.