Lah palat spah snem ym pat ioh surok ka shnong Mawshuit bad Nongbah

Ki nongshong shnong ka Mawshuit bad Nongbah haduh mynta da ki spah snem, kam pat ioh mad ia ka surok bha bad ki dang hap ban iaid satar ha ka surok khohruh khohram.Ka jingbym don ia ka surok bha ha kane ka thaiñ jong ka shnong Mawshuit bad Nongbah ka la buh jingeh ia ki paidbah kiba leit ba wan khamtam ia ki briew kiba pang ba shitom.Kine ki shnong ki don ha ka thain Khatar Shnong ka Sohra konstitwensi bad ki nongshong shnong kim pat ioh mad ban iaid ha ka surok kaba bha hynrei ki hap iaid da ka surok sniew khohruh khohram kumba 3 km bad sa ka kjat pat ban poi sha shnong.

Watla ka surok naduh Mawjrong ter ter shaduh Kongthong kala bha hynrei ka surok kaba phai sha shnong Mawshuit, Nongbah pat ka dang dei da ka khyndew ha kaba ki kali kin shem jingeh ban iaid wat ha ka por aiom ba rang bad katno tam kan long ka jingeh ha ka por aiom slap. Ka shnong la bunsien ka la ju leit iakynduh ia ki nongmihkhmat ban iakren halor kane ka surok na Wahjri shaduh ban poi ha shnong Nongbah kaba kut artad ka surok, hynrei kala shu sahkut haduh mynta.U Secretary ka Raid Mawshuit u Bah Kyntiew Khongshei haba iakren bad ki lad pathai khubor, ula iathuh ba ka raid ka la ju leit man ka por sha ki nongmihkhmat hynrei ka jubab ka long ba ka thong ka long ban pynioh noh ia ka surok hynrei haduh mynta ka jingap khmih lynti ki nongshong shnong kam pat urlong satia.

“ Ngi na ka shnong ngi ju don ka jingangnud ban iohnoh ia ka surok ba bha bad ngi la ju leit mih sha ki nongmihkhmat ban kyrpad ban pynioh bha, hynrei ki la shu kular ba kin sa peit bad shimkhia,” ula ong.Ki la iathuh ba bunsien ia kane ka surok man u snem ki ju shna pynbha hi na ka shnong bad ki la kyntu ia ka sorkar ba kan peit lem ia kane ka shnong namar ka surok kadei ka budlum jong ka ioh ka kot. Ha Raid Mawshuit ki don ruh shibun ki jaka jngohkai kum ka wah myor, jingkieng jri, ki krem, ki lum kiba itynnad bad lada kan ioh ia ka surok, kan kyntiew ia ki paidbah ha ka ioh ka kot.