Lehkmen ka MAWU bad ki mei-ieid Kripa Senior’s Home ban rakhe ia ka Intr. Women Day

Shibynta ban kynmaw burom ia ka sngi kyrpang jong ki longkmie kaba ju tip kum ka International Women’s Day, mynta ka sngi, ka kynhun jong ka Meghalaya Asha Worker Union (MAWU) ka la pynlong ia ka jingleh kmen kyrpang bad ki mei Ieid kiba shong ba sah bad ri sumar hapoh ka Kripa Victoria Senior Citizen Homes, Umiam Pyllun. La wan ban ia lehkmen lang ha kane ka sngi da ki nongialam ka MAWU kiba kynthup ia ka Kong Mirajone Myrsing, President, ka Kong Wanshailang Wahlang, General Secretary, ka Kong Sony Kharjana, Adviser, ha kaba la ia donlang ruh ka Kong Victoria Wahlang, kaba dei ka nongseng jong ka Kripa Victoria Senior Citizen Homes nalor kiwei kiwei.

Ha kane ka jingleh kmen na ka liang ka MAWU, ki la sdang da jingrwai ai khublei ia ki mei Ieid kiba sah ha kane ka jaka sah ki longkmie, nalor ka jingduwai kyrpang, la sam ia ki jingai sngewbha bad ka jingot ia u cake ban lehkmen ia ka sngi kyrpang jong ki longkmie kaba la wanrah ruh ia ka jingphuhmut phuh mat ia ki mei Ieid kiba shong basah ha ka Kripa Victoria Senior Citizen Homes. Haba kren ha kane ka sngi, ka Kong Mirajone Myrsing, ka la ai ia ka khubor kitbok kitrwiang ia baroh ki longkmie ha kane ka sngi kyrpang jong ka Women’s Day, da kaba ong ruh, ba ki longkmie ki don ia ka bynta kaba khraw ymtang ban saindur ia la ka iing ka sem hynrei wat ha shnong ha thaw bad ka imlang ka sahlang.

Ka la ong ruh, ba ka jingwan jong ka kynhun ki nongtrei Asha ban lehkmen bad ki mei Ieid ha kane ka jaka ka long ban ai mynsiem ia ki ruh ba kin nym don ka jingsngew sah marwei ne kynjah hynrei ban don ka jingsngew shngain namar ki don kiba kynmaw Ieid ia ki man la ka por, ka la ai khublei kyrpang ruh ia ka Kong Victoria Wahlang kaba la shim ia ka bynta kaba khraw ban seng ia kane ka jaka shong sah jong ki mei Ieid da kaba ai ruh ia ki jingsumar kiba paka ban ri ban sumar ia ki mei Ieid ha ka jinglong rangbah ka jong ki.