Leit rung u Bah Lambor sha ka NPP ryngkat ki nongbud

Ka seng NPP hynne ka sngi ka la pdiang burom ia u MLA/MDC barim ka Nongkrem Constituency u Bah Lambor Malngiang ryngkat bad ki nongialam bad nongkyrshan kiba la wan ban pyniasoh noh bad ka seng NPP. Ia u Bah Lambor Malngiang ryngkat bad ki nongialam bad ki nongkyrshan, la pdiang sngewbha da u President ka NPP Meghalaya u Bah Prestone Tynsong ha ryngkat ka jingdonlang u Myntri Rangbah ka jylla uba long ruh u National President ka NPP u Conrad K Sangma, ki nongialam ka NPP kiba kynthup ia u Bah Sniawbhalang Dhar, Bah Wailadmiki Shylla, Bah Hamletson Dohling, ki MLA, ki MDC bad kiwei kiwei. Haba kren ha ka jingialang u Bah Lambor ula ong ba 2 snem mynshwa ki nongialam bad ki nongkyrshan ki jongu kila mana tyngeh ia u ban pyniasoh bad ka NPP bad mynta dei hi ma ki kiba la shim ia ka rai ban phah ban pyniasoh noh bad ka NPP na ka bynta ban ai jingshakri ia ki paidbah ha ka Nongkrem Constituency bad ban pynkhlain ia ka NPP ha ka jylla baroh kawei.

 “Ngam shym rung sha kane ka party ban ong ba ynda la poi ka elekshon ban iakhun ban rem. Em nga rung ban pyntikna ba ngin poi sha ka jingjop,” la ong U Bah Lambor. U Bah Lambor ula ong ba ka jingwan ka jongu bad ki nongkitkam bad nongkyrshan kam dei tang ban shu pyniasoh bad ka seng NPP hynrei kin trei shitom ban pynthikna ba ka NPP kan jop syndon ia ka elekshon MLA ban wan na Nongkrem Constituency da ka jingiatreilang bad ka jingiatylli kum ka seng. Ula ong ruh ba lada nujor ia ka roi ka par kaba wan ha ka constituency kala iapher bha, na kaei kaba ki paidbah ki ioh pdiang ha ka por ba u dang long kum u MLA bad ia kane la sakhi shai kdar da ki paidbah. U Conrad K Sangma, ula kyntu ia ki paidbah ba kin pyndonkam da ka Right To Information (RTI) ban lap la ki MLA bad MP scheme kidei kiba la pyntreikam hok ha ki constituency ba bat da ki seng sain pyrthei kiba don ha ka Liang Pyrshah kiba kam ba duna ki kam pynroi ha ki jaka jong ki.

Ula ong “Don ki por haba nga khmih ia ki constituency bapher bapher, khamtam ha ki jaka jong ki Liang Pyrshah, ka roi ka par ka duna bha. Nga artatien la ki MLA ki pyntreikam hok ne em ia ki skhim MLA ha ki constituency jong ki” ong u Conrad bad ka kyntu ia ki nongshong shnong ha ki constituency jongki Liang Pyrshah ba kidei ban wad jingtip lyngba ka RTI ban lap ia ka jingshisha baroh. Na ka liang u Bah Prestone Tynsong ula ong, ba ha ka elekshon MLA kaba la dep dei namar ka jingiakhun pyrshah u Bah Lambor ia ka seng NPP hynrei baroh ar ki lah ia rem lang ha ka elekshon hynrei mynta da ka jingiatreilang kin poi sha ka thong jong ka jingjop ha ka elekshon MLA ban wan.