Mar ia sdang ka dorbar mang tyngka ka JHADC wanrah point of Order u MDC Rikut Pareiñ ba jah ka motion

Ha ka sngi sdang ka dorbar mang tyngka ka JHADC kaba la long mynta ka sngi, mar  ia pynbna u chairman u Dr.Sankey Shangpung bala sdang iaka dorbar, ieng wanrah point of order u MDC opposition naka Saphai Sahsniang constituency u Rikut Pareiñ pyrshang ia u chairman halor ka jingbym paw ka motion ba u wanrah da kaba pan jingpynshai ruh iaka daw bala kyntait iaka motion jong u. Naka liang u chairman u ong ba ma u kum u chairman u don ka bor ban pdiang bad ban kyntait ia kano kano ka jingkylli ne motion kaba um i biang ban wanrah hadien bala dep bishar bniah iaka, bad ia kane la leh da kaba bud thik katkum ki kyndon.

U Rikut Pareiñ ula ieng biang ban ong “Haoid katkum ka rules 62 phi don ka hok  tangba dei ban don pat ki kyndon ba shai haba kyntait iaka motion”.U pynpaw ruh ka jingsngewkhia halor ka jingshah pyndam ki jingkylli khlem ki nongrim kiba biang.Ka Deiwi Tongper MDC Narpuh ruh kala ieng ban pynpaw jingpyrshah halor ka jingbympaw ka jingkylli jongka kiba iadei bad ka Trading Licence, bad ong ruh hato kane ka jingkylli kam i donkam seh ban iakren hapoh ka ïingdorbar. Hadien kane ieng sa u Awhai Andrew Shullai nongialam ka liang pyrshah uba la ong “Shwa ba ngin iaid shakhmat ia kane ka kam ruh ngi la iakynduh iamir jingmut lypa bad phi da kaba pyni iaki jingkylli namar ba ngi iohi haka session bala dep bun ki jingkylli ki motion ki shu jah,  wat haba ki motion ba wanrah ruh kim dei shabar ka ADC rules”.

“Lada phi ong bym shai ruh ngi dang hun, hynrei kin shu jah khlem da shai iaka daw wat haba ngi la trei shitom ban wanrah dei ka bym lah ban pdiang, namar ngi don ka hok ban ioh jingshai” bynrap u A.A.Shullai.”Ka jingshim bor jongphi ban leh hala ka mon lajong,  mangi pat kiba wan daka jingjied u paidbah ban wanrah ki mat iakren  ba donkam phi shuh pynjan noh iaki, kumno ki paidbah kin peit iaka jingshaniah ha kane ka ïing dorbar jong ngi”. pynkut u A.A.Shullai.