U MLA barim ka West Shillong constituency u Bah Mohendro Rapsang u la mih noh na National People’s Party (NPP) halor ki daw shimet.
Ha ka shithi iehnoh kam ba la phah sha u president ka NPP Meghalaya u Bah Prestone Tynsong ha ka 10 tarik Rymphang, u Bah Rapsang ula ong, “Nga phah kane ka shithi iehnoh kam jong nga kum u dkhot ka NPP namar ki daw shimet”.
U Bah Rapsang ula pynpaw ka jingsngewkmen halor ka jingïoh ban shakri ïa ka party ha kine ki saw snem ba la dep.
“Nga sngewnguh shisha ïa ka NPP kaba la ailad ïa nga ban shakri bad ïatreilang ha kine ki saw snem ba la dep,” ong u Rapsang da kaba bynrap “Ka jingshemphang bad ka jingkyrshan kaba nga la ïoh ha ka por ba nga ïasyllok bad ka Party kan long kaba kordor beit.” Nga shim ia kane ka kabu ban kitbok kitrwiang ia ka Party ba kan dang iai bteng ban shakri ha ki por ban wan.”
U Bah Rapsang ula pyniasoh sha ka NPP shwa ka ilekshon MLA 2023 hadien ba ula shah sospon ha ka Congress namar ba ula ai jingkyrshan ia ka Sorkar MDA-I.
Ula iakhun ia ka ilekshon na ka tiket ka NPP hynrei ula rem noh ha u Bah Paul Lyngdoh na ka United Democratic Party (UDP).
Ki tyllong khubor ki iathuh ba u Bah Rapsang, u lah ban pyniasoh sha ka Bharatiya Janata Party (BJP) kum ka jingpynkhreh ia ka ilekshon MLA 2028.