Mynta taiew yn iakynduh ka ‘Peace Committee’ na ki ar Jylla ban wanrah jingshngain ha shnong Lapangap

U Symbud Myntri Rangbah Ka Jylla u Bah Sniawbhalang Dhar, ula pyntip ba ka sorkar jylla shen kan sa shong da ka jingialang Peace Committee ban iakren bad ka jylla Assam, khnang ba ki paidbah kin lah ban ot kba khlem kano kano ka jingshah pyndik. Haba kren sha ki lad pathai khubor, u bah Sniawbhlang ula ong ba ka jingshah pyndik khah khah jong ki briew bad ki nongrep jong ka shnong Lapangap ha ki jaidbynriew Karbi khamtam ha kum kane ka por ban ot kba ka buh jingeh ia ki.

U Symbud Myntri Rangbah, ula ong ba u la dep ban iakren bad u ADM uba dei peit ia ki jaka ha ka thain Lapangap ha kaba ha ka taiew ban wan kin sa shong jingialang jong ka Peace Committee jong baroh artylli ki jylla. “Ha ka 29 bad 30 tarik u Nailur kan sa don ka jingialang ban pyrkhat ban wanrah ia ka Peace Committee khamtam ha kum kane aiom ot kaba ki briew jong ka thain Lapangap ki shah pyndik ha ki briew Karbi bad ia kane la iakren bad u DC ka WJH,” ong u bah Sniawbhalang.

Ha kaba ia dei bad ki kam ia pynbeit pud na ka liang U Symbud Myntri Rangbah ula ong ba ka jingiakren ka dang iai bteng hynrei kumba ka long mynta donkam shwa ban pynbeit ia ka jinglong jingman bad ka huri hura ha Lapangap. Halor ka jingdawa ki paidbah jong ka thain ban buh da ki bor pulit ban ai jingiada, na ka liang u Bah Sniawbhalang ula pyntip ba un sa iakynduh bad u Chief Secretary lem bad ka DGP na ka bynta ban leh ia kaba donkam.