Uwei u rangbah ba dang 22 snem snem ka rta na ka shnong Lawblei, kaba jngai 15 KM eiei na Mawkyrwat ha South West Khasi Hills District u la duh ei ia la kajong ka jingim hadien ba u la ur bad hap ha Wah Umngi katba u dang leit tong doh bad ki lai ngut kiwei pat ki paralok ha ka janmiet Sngi U Blei ha ka por kumba 6:30 – 7:00 PM eiei na kawei ka jaka kaba ki shait khot ka Shar-shar, kaba jngai tang kumba 2 KM eiei na ka jingkieng Wah Umngi ha ka surokbah Mawkyrwat-Shillong. Katkum ka jingiathuh jong ki paitbah nongshong shnong ka Lawblei, la ong bai a utei u briew la tip kyrteng kum u Bah Sainkupar Lyngkhoi (22) uba ka shnong trai jong u kadei na ka shnong Lawbyrtun ha Eastern West Khasi Hills District uba la poi shongkha ha ka shnong Lawblei.
Ki paitbah ki la iathuh ruh ba hynnin ka Sngi U Blei ha ki por kumba 3 baje eiei janmiet, u Bah Sainkupar ha ryngkat bad lai ngut ki khynnah shynrang na ka shnong Lawblei ki la leit thong doh na Wah Umngi bad dei ha ki por kumba 6:30-7:00 baje eiei janmiet katba ki dang leit tong na kawei ka jaka ba ki khot ka Shar-Shar ba utei u rangbah u la ur bad hap hapoh wah, bad la suba jur ba u la ngam jyllop syndon namar ba naduh katei ka por ba u hap ym shym la iohi syrngiew eiei shuh ia u. Ki tyllong khubor ki iathuh ba mynta ka step na ka liang jong ka Sersech & Rescue Team (SRT) napoh Shillong ha ryngkat ka jingiarap jong ka kynhun Fire & Emergency Service (F&ES) na Mawkyrwat bad ki paitbah na ka shnong Lawblei, ki la pyrshang katba lah ban wad ia utei u briew baroh shi sngi, hynrei kaba sngewsih ka long ba kim shym la lap satia ia u.
“Ka kynhun ka la hap ban wan phai noh sha Mawkyrwat ha ka por janmiet namar ba ym lah ban pynlong ia ka jingwad na ka daw ka jinglong riat ka jaka bad kumjuh ruh ka jingkhlain palat jong ka um khamtam hadien ka jingwan u slap ha kine ki khyndiat sngi ba la leit”, ong uwei u heh pulit uba la bynrap ruh ba ka SRT kan sa pyrshang biang lashai ka sngi ban wad biang ia utei u briew lada ka mariang ka ailad. Haba kren bad ki lad pathai khubor, u Myntri ka shnong Lawblei, u Bah Swington Lyngdoh u la pynpaw ia ka jingsngewdiaw kaba khraw halor kane ka jingjia bad khamtam eh ka jingduh jingkyrmen ban dang lap ia utei u rangbah ha kaba ki SRT ruh ki la kren shai ba ka long kaba eh ban dang lap ia utei u briew bad u la kyntu ruh ia ki paidbah bad khamtam eh ki nongkhwai kiba ju mlien ban leit khwai na Wah Umngi ba kidei ban husiar bha namar ba kiba kum kine ki jingjia ki ju jia manla ka snem ha kane ka wah ha kaba ki briew ki la shu duh ei ia la ka jingim tang na ka daw jong ka jingleh shlur khlem tip ia ka jaka. “Ka jingeh ka long ba ki leit sha wah bad ki leh shlur khlem da tip ia ka sawdong sawkun jong kane ka jaka, bad ki tang shu bakla tiak bad tang hapdeng katto katne sekhon ki la duh noh ia la kajong ka jingim namar,” la ong uwei u rangbah.