Plie u MR ar tylli ki hostel ha ka jinglut ba T.6 klur ha Mendipathar Resubelpara

U Myntri Rangbah ka jylla u Conrad K Sangma hynne ka sngi ha Mendipathar, u la plie paidbah ia ki katto katne ki sienjam ban iada ia ka mariang ka Climate Action and Climate Adaptation Goals ha Meghalaya. Ha kane ka jingialang, u Conrad ula plie paidbah ruh ia artylli ki Girl’s Hostel ha Mendipathar bad ka Tribal Hostel ha Resubelpara. Ia ka Girls’ Hostel ha Mendipathar College, la tei ha ka jinglut jingsep kaba kot T.3 Klur ka ban pyniaid da ka Awe Self-Help Group (SHG), katba ia ka Tribal Girls’ Hostel ha Resubelpara la tei ha ka jinglut kaba kot T.2.5 Klur kaban pyniaid da ka Ramke Memorial School. “Kine ki Hostel kin ai ia ka jingshngain, jingiada bad kyrshan ia ka rukom im jong ki kynthei khamtam eh ia kito kiba wan na ki thain nongkyndong bad kan iarap ruh ha kaban pynlah ia ki ban bteng ia ka jingpule khlem kino kino ki jingeh” ong u Myntri Rangbah.

U Myntri Rangbah ula pyntip ba ka Climate Adaptive Community-Based Water Harvesting Project kaba la kyrshan da ka ADB, ka long ka projek kaba palat ia ka T.500 Klur ia kaba yn pyntreikam ha kylleng ki district jong ka jylla Meghalaya ban kyntiew ha kaban pyneh ia ka jingdon ia ka um ka wah. Ha kajuh ka por, u Myntri Rangbah ula plie ruh ia ka “Megh Adapt Pay”, ka project kaba T. 47.19 Klur bad kane ka projek ka dei shibynta jong ka Climate Adaptive Community Based Water Harvesting Project ban thung ia ki dieng, ban pynneh pynsah ia ki khlaw kiba la don lypa bad ki jaka rep ba la pyntreikam da ka Soil & Water Conservation Department.

U Myntri Ragbah ula pyntip ba lyngba kitei ki projek, ki shnong ki thaw bad ka sorkar kin iatreilang ban iarap ha kaban iada ia ki khlaw, ban kyntiew ia ka sawdong sawkun ha kaba iadei bad ka koit ka khiah ban pynneh ia ki jaka kiba don ia ki tyllong um bad ban pyniar ia ka jingjyrngam ha kylleng jong ka jylla. Ha kane ka sngi la synranlang kiwei ki Myntri sorkar kiba kynthup u Myntri ka tnad PHE u Marcuise Marak, u Myntri ka tnad Social Welfare u Bah Paul Lyngdoh bad kiwei de ki MLA.