Ka Shillong Tech Park-II ba T.121 klur kan sei ki buit treikam thymmai ban sengkam”

U Myntri Rangbah ka Jylla Conrad K Sangma mynta ka sngi ula plie paidbah ia ka Shillong Tech Park-II ha New Shillong Township ha ka jingiadonlang u Myntri Bah Sanbor Shullai, u Chief Secretary Dr Shakil Ahammed bad ki Nongtrei ka Tnad IT.

Ka Phase-II ka bynrap 1.8 lak sq phut ka jingtei ba la dep satang ban pyndonkam beit ha ka jinglut ba T.121 klur. Ka dei ka jingtei bynrap ba heh duh ka IT hapoh ka Jylla haduh mynta.

Haba kren ha ka jingialang, u Myntri Rangbah ula ong ba mynta ka sngi u sngew kumba ka jingphohsniew ka la urlong shisha, na ba ka jingthmu jong ka IT Park/ Tech Park/ Innovation hub ka dei ba ula pyrkhat nyngkong ha u snem 2008 ban ai jaka na ka bynta ban sei ia ki buit treikam thymmai, ka sengkam bad ka teknoloji ba kan roi ha Shillong.

Ha kane ka jingialang plie, ki jingiateh kular ba kongsan la iasoi bad ka StaffFlex LLP, ka kompani na Shillong kaba ai ka jingshakri ban pyniaid kam sha ki briew ha UK, Shamrock AI, ka kompeni multinational kaba don ha Shillong kaba la don lypa ha ka Phase I, kaba shim mynta ia ka jaka ba kham heh ha ka Phase II, ka Alorica, ka kompani multinational ba na US ka ban shim ia ar mala, ka Artificial Intelligence Centre of Excellence (AI-COE) kan donlang ha katei ka park, kaba la kyrshan lyngba ka India AI Mission jong ka Ministry of Electronics and Information Technology.

U Myntri Rangbah ula pyntip ba ka Phase-II ka la jan dap lut ba bat ki kompani ha shuwa ka jingplie, kaba long ka sakhi kaba shai ba ka jingdawa ia ka jaka treikam Grade-A technology ha Shillong ka la palat ia ka jingdon jaka.

Ula pynpaw ba ki kompani na Jylla kum ka StaffFLex bad Shamrock AI ki la shim ia ka jaka ha ryngkat ki kompani multinational, kaba pyni ba ka park kam dei tang ka jaka na ka bynta ki kompani ba nabar hynrei ka jaka kaba ki kompani bala seng ha Meghalaya kila ai jingshakri ia ki briew ha kylleng ki ri ka pyrthei.

U Myntri Rangbah ula ong ba ka Meghalaya mynta ka dei kawei na ki Jylla ba kiew sted bha ha ka ioh ka kot hapoh ka Ri, kaba la ioh ia ka jingkiew ba arshah ha ka ioh ka kot naduh u 2018 haduh mynta, bad ka thong ban kiew biang arshah ha shuwa u 2032. Kane ka long kaba lah ban leh namar ka jingbiang ki policy. Ka Meghalaya ka dang 54 snem bad kala iohi haduh 27 tylli ki Sorkar, don katto katne kiba neh tang shibnai. Kane ka Sorkar ba mynta kala iaid ha u snem ba 8-ka Sorkar kaba neh slem tam ha ka histori jong ka Meghalaya, kaba long kongsan bha ha ka jingkiew shaphrang ka Jylla.

Ula ong ba ka Tech park kan ym lah ban trei marwei khlem ka jinglong jingman ka sawdong sawkun ha ka trei ka ktah. Ula kdew: Ka jingtei ia ka football stadium kaba heh duh hapoh ka Ri ha ka jinglut ba T.700 klur.

Ka New Secretariat ha New Shillong ka ban sa biang nadong hadong ban kynriah hapoh u Nailar 2027, ka jingpynkha ia ka Adinistrative City kaba da plan bha.

Na ka zero 5-star hotel ha u 2018 sha ka 10 ki ban sa mih, kynthup kawei ka ban don marjan ka IT park.

Na ka jingbym don liengsuin ha u 2018 sha ka jingsdang shna pynheh ia ka runway, ka ban pynlah ia ki liengsuin kamai kiba heh ba kin hiar ha Shillong Airport hapoh u Nailur-Risaw 2027. Ka Shillong Airport kan shimpor tang hapoh 20 minit na ka IT Park.

Ka Guwahati Express Highway ba T. 24,000 klur, ka ban pynduna ia ka leit ka wan na Shillong-Guwahati sha ka 90 minit duna.

U Myntri Rangbah ila ong ba ka bynta kaba kongsan eh ha ka jingkiew ka IT ka dei ka jingdon ki nongtrei. 50% na ki nong shongshnong ka Meghalaya ki dei kiba hapoh 20 snem bad tang 5-6 lak ngut kiba halor ka 45 snem ka rta. Ki samla ki dei kiba tip bad shemphang bha ia ka technology, sei ia ki buit thymmai bad kiba lah ban pyniasoh bad kaei kaba iaid ha ka pyrthei. Ka Sorkar kala bei pisa ban pynroi ia ka sap lyngba ka MSSDS, ka Meghalaya Skill Program, ka Government Engineering Committee ba nyngkong eh kaba dang pynkha arsnem mynshuwa bad ka Skill University ka ban sa wan mar khap ha ki 1-5 haduh 2 snem.

U Myntri Rangbah ula ong ba ka Shillong ka dei ban long ka Centre of Excellence na ka bynta ka thain Shatei Lam Mihngi ka ri India, ka BIMSTEC bad Southeast Asia, ka technology hub kaba ki briew ki wan ban sei ia ki buit thymai.