Na ki 365 ki jaka, la sam 282 ia ki nongdie madan ba ioh COV

U Myntri ka tnat Tourism u Bah Paul Lyngdoh uba dei ruh u Nongaiktien ka Sorkar Jylla ula kam ka 24 tarik Naitung ka dei ka sngi ka ban sah jingkynmaw ia ka nongbah Shillong bad ia ka Jylla Meghalaya baroh kawei. Ïa kane u Bah Paul u ong hadien ba ki nongdie jingdie madan na ki thaiñ Khyndai Lad ki la mynjur ban kynriah noh sha ki 2 tylli kiba jaka ba la ithuh da ka Sorkar Jylla. Haba kren shaki lad pathai khubor u Bah Paul u la ïathuh ba ki don 407 ngut ki nongdie jingdie madan kiba don hok ban ioh Certificate of Vending (CoV) ban shong die jingdie haki thaiñ Khyndai Lad. U Bah Paul u la ïathuh napdeng ki 407 ngut, 311 ngut ki dei kiba la ioh COV ban ioh shong die jingdie ha ki thaiñ Khyndai Lad bad hynne ka sngi ka Shillong Municipal Board (SMB) ha ka jingiatreilang bad ki bor District ki la dep ban pynkynriah ïa ki sha ka Parking Lot MUDA.

U Myntri ula ïathuh ba ka tnat Urban Affairs ka la dep ban tei 365 tylli ki jaka ia ki nongdie madan ha Parking Lot MUDA Khyndai Lad bad haduh mynta 282 tylli ki jaka shong la dep sam sha ki nongdie jingdie madan da  ka ba pynkhalai nusib. “Ka jingpynkhalai nusib na ka bynta kito kiba la ioh ia ka COV ka dei ban pynthikna ba kan nym don ka jingleh shilliang khmat ha ka por sam jaka shong ia ki nongdie jingdie madan” la ong u Bah Paul. U Bah Paul u la ong baka Sorkar ka ai khublei iaka Roadside Hawkers Association kaba la wan shakhmat ban kyrshan iaka jingthmu jong ka Sorkar Jylla ban pynthikna ka jingshngain ka iaid ka ïeng ki paidbah haki surok, ki jaka iaid kjat (Footpath). Haba batai iaka rukom ithuh iaki nongdie jingdie madan kiba dei hok ban ioh die jingdie haki thaiñ Khyndai Lad, u Myntri ka tnat Tourism u la ong “Ka jingjied iaki ba dei hok ban ioh die jingdie haki thaiñ Khyndai Lad ka kynthup ba ki nongdie jingdie kin dei ki nong shong shnong jong ka Meghalaya la palat 6 snem bad kidei ruh kiba ju die jingdie haka juh ka jaka palat 6 bnai hashuwa ka sorjamin”.

U Bah Paul ula ong ba ka Sorkar kan pyndonkam da kajuh ka rukom ha ka ban jied ia ki nongdie jingdie madan ha kiwei pat ki jaka jong ka nongbah Shillong. U Myntri ula ong ruh ba ka Sorkar kan siew ka bai lutksan T.10 hajar iaki nongdie jingdie madan ban iarap ia ki haba iadei bad ka bai kit, bai bah iaki mar mata shala ki jaka ba ki la kynriah mynta. “Ka Sorkar kan siew ruh T.2 hajar sha man ki nongdie jingdie naka bynta 5 bnai ban ai jingkyrshan iaki khamtam namar ki dang jingdie jingdie haki jaka thymmai” u la ong.