Na u Modi phah tuklar u Saleng ban pynheh ia ka Baljek Airport

Ka jingthmu ban pynheh bad pyniar ia ka Baljek Airport ha West Garo Hills district kala sdang bad naka liang u MP ka Tura Parliamentary Saleng A Sangma ruh ula shimkhia bad ïakren halor kane ka mat bad u Myntri Rangbahduh ka Ri u Narendra Modi. Lah ban kdew ba dang shen ka Sorkar Jylla kala iasoi daka Memorandum of Understanding (MoU) naka bynta ka Operations & Maintenance (O&M) and Communications, Navigation & Surveillance/Air Traffic Management (CNS/ATM). Iaka Mou la iasoi naka bynta ban sdang pyntreikam noh daki 20-seater aircraft ban pyniasoh iaka thaiñ Garo Hills bad kiwei ki nongbah daka Lengsuin. Haba kren shaki lad pathai khubor u Saleng ula ïathuh ba iaka Baljek Airport yn pynher bad pyniar lyngba ka skhim UDAN bad ula pynpaw ba kane ka kad Liengsuin kan ai jingshakri kaba tista iaki paidbah ka thaiñ Garo Hills.

“Nga lah dep ban phah ia ka shithi sha u Myntri Rangbahduh ka ri bad ia u Myntri uba dei khmih ban pyniar iaka Baljek Airport daka ba wanrah ki liengsuin kiba 75 seat ym 20 seat khnang ba kan lah ban ai ia ka hok na ka bynta ki paidbah ka jylla” la ong u Saleng. U Saleng ula ong ba watla ka Sorkar Jylla kala iasoi MoU hynrei ka Baljek Airport kam pat hap hapoh ka Map jong ka AAI. “Nga lah kylli ia ka jingling jingman jong ka Baljek airport ha ka jingialang kaba la long ha New Delhi ha u Nohprah (mynshem snem). Ka jubab kaba nga lah ioh ka long ba ka jingialang jong ka AAI kaba la long ha Lakshadweep ha u Kyllalyngkot kala ong ba ka Baljek Airport kam shim la don ha ka map jong ka AAI”.

“Namar ba ka sorkar Meghalaya kala dep iasoi ia ka MoU bad ka AAI, Baljek airport mynta ka lah ban shah kynthup lang (ha ka map). Mynta kila pan ia ka lisen. Ha katei ka por, kam shim la don ka jingpan lisen da ka sorkar Meghalaya. Ka Baljek Airport kala long ka kad liengsuin jong ka sorkar jylla bad kam dei kaba hap satia hapoh jong ka AAI,” ong u Sangma. Lah ban kdew ba ka AAI kala kyrpad ban ai jaka shuh shuh ban shna pynheh ban ioh ban pyntreikam pura bad ka sorkar jylla kala mynjur ban shim sa 125 akar na ka bynta ka wat kaba nyngkong bad ban shim jaka sa 115 akar na ka bynta ka wat ka baar. Ka jingthmu kaba hakhmat eh ka long ba ia kane ka kad liengsuin dei ban sdang pyntreikam noh mardor da kaba ai jingshakri da ka liengsuin kaba 20-seater bad ka thmu ban pyndonkam pat da ki liengsuin ATR-72 ha ki snem kiban sa wan.