Naduh dang khynnah don u bah Disparsing ïa ka thong ban ïarap imlang sahlang

U Bah Disparsing Rani u dei uwei na ki khyndiat ngut ki riew rangbah uba ju thrang ban iarap ia ki paidbah na ka bynta kaba bha bad kaba shisha. Ha ka jingiakren halor ka jingiaid lynti jong u ban wad jingtip da ka Right to Information (RTI) Act, u bah Disparsing ula iathuh ba naduh ba u dang khynnah u don ka thong ban iarap ia ka imlang sahlang bad dei na kata ka daw, u wad jingtip ia kino kino ki kam ban lap ia ki jingshisha kiban iarap ia u paidbah khlem da khein iano iano. Ula iathuh ba ha ka jinglong jong u, um sngewtynnad ban treikam sorkar hynrei u don ka thong ban iarap ia ka imlang sahlang kumba long u kpa jong u, uba dei u Rangbah shnong ha Tyrsad la lai samoi, u ruh u ju sngewtynnad ban bud ia ki matti u kpa jong u.

Ula iathuh ba ula sdang naduh u snem 2006 ban wad jingtip da ka RTI na ophis Custom ha kaba ki don ki kam ba u iatyngkhuh bad ki ophisar bad u bud ter ter. “Ka jingsdang nyngkong ia ka jingwad RTI, ka dei tang ia ki skhim sorkar, halor ka jingyntreikam ia ki skhim painkhana namar ba nga iohi ba ka jingpyntreikam ia kane ka skhim kim iaid kam kumba la buh ha ki kyndon ne Guideline jong ka Swacch Bharat,” la iathuh u bah Disparsing.Haduh mynta ka jingwad RTI jong u ki la poi sha ki hajar bad phew hajar tylli bad bun ruh ki RTI ki la seisoh. Ula iathuh haba u iarap kam ia ki paidbah, u ju iarap sngewbha bad haduh mynta ka jingleh RTI jong u, um ju ap bad um ju kynmaw ia ka nongkylliang namar haba iarap ia u paidbah nyngkong eh hap trei shitom shwa ialade. Ha kajuh ka por, u la ong ba um ju trei kontrak bad um ju don jingiadei bad ki riew sain pyrthei bad kata ka la pynlong ia u ban laitluid ban ym shah treh mraw.

U Bah Disparsing ula ong ba bun ki Activist ne ki nongtrei mon sngewbha ki ju shah byrngem hynrei ma u, ban lait na ka jingshah byrngem, um iadei paralok bad ka sorkar ne bad kano kano ka party namarkata ka daw, u long laitluid bad um ju shah teh mraw namar ka thong jong u ka long ban trei beit na bynta u paidbah ym na bynta jongno jongno.“ Ki don ki jingshah byrngem, hynrei ngam sngewpher namar nga la shait mlien ban kynduh ia kum kane bad nga la shah byrngem naduh u 2001 ha ki lehnoh ha kaba ki la byrngem ban pyniap ia nga hynrei ngam salia namar nga ieng ha la ka jong ka hok. Da dei ba ngam buh nyngkong ia ka thong, naduh mynno nga la iap, namar ka kam ba leh ma nga ka long kaba shyrkhei bad kaba eh bha”, ula ong. Lah ban ong ba ka jinglap wad RTI u bah Disparsing ka la iarap ia shibun ki briew ban sei madan ia ki jingshisha khnang ba ki paidbah kin shaid bad tip ia ki jingshisha namar ba ka ong ka ktien, ka jingtip ka dei ka bor.