Ngan rah da ka ‘Zero Hour Notice’ ha Parliament: Dr WR Kharlukhi

U Member jong ka Parliament (MP) Rajya Sabha u Dr WR Kharlukhi hynne ka sngi ula pyntip ba un rah da ka ‘Zero Hour Notice’ hapoh ka Parliament halor ka jingkhang tih dewiong ka National Green Tribunal (NGT) hapoh Meghalaya. Haba kren sha ki lad pathai khubor u Dr Kharlukhi ula ther tyngeh ia ka NGT bad kynnoh ba ka trei arsap hapoh Meghalaya, hynrei kam shym la leh eiei halor ki khubor ka jingiap da ki million ngut ki briew na ki jingpang ba mih na ka jingpynmih jaboh jong ki karkhana. U MP ula kynnoh ka NGT ka shym shim ia ki sienjam halor ka jingiap ki Milliong ngut. “Hynrei ka (NGT) kloi pat ban shimkhia bad leh eiei pyrshah tang ia ka jingpynjaboh ia ka mariang namar ka jingtih dewiong hapoh Meghalaya” ula kynnoh.

“Ngan sa wanrah da ka zero hour notice ha Parliament. Hooid, ka NGT ka long pyrshah bha ia ka jingtih dewiong beain ha ka Jylla, ki la ialeh pyrshah ia ki briew jong ngi bad ka la ktah jur ia ki nongtih dewiong barit baria. Hynrei kaei kaba pynshaiong ia nga ka dei ka khubor kaba mih ha ka ‘The Hindu’ ka ba ong ba da ki million ngut ki briew ki la iap namar ka jingpynmih jaboh jong ki karkhana. Ka NGT ka la leh ia aiu halor kane, bun ki metro ki la shah ktah namar kane? Ngan sa rah iakren ia kane ka mat ha Parliament. Kane ka paw ha nga ka dei ka jingtreikam arsap” u la ong. U Dr Kharlukhi ula ong ba ki nongshong shnong ka Meghalaya ki la shah ktah bha na ka jingkhang tih dewiong ka NGT ha u snem 2014 khamtam namar ka kam tih dewiong ka dei ka lad kamai jakpoh jong ki paidbah/

U la ong ba kane ka jingkhang tih dewiong ka NGT ym tang ba ka pynduh kamai jakpoh ia ki paidbah hynrei ka la ktah jur ruh ia ka jingioh lum khajna jong ka Jylla bad ki Autonomous District Council (ADC). Halor ki jingkylla u Dr Kharlukhi u la ong, “Phi iohi ki ong ba ka jingtih dewiong thliew khnai ka ktah ia ka mariang hynrei ka jingpynjaboh pat da ki karkhana kaba ktah ia ki jingim ki briew. Ka mut ka jingim briew kam long kongsan, Nga sngew ba ka jingim ki briew ka dei kaba kongsan ban ia ka mariang hynrei kaei kaba nga mut ban ong ka long ba ki dei ban wad bniah balei ba ka jingtih dewiong ka ktah ia ki wah. U la bynrap da kaba ong ha ka jingshem jong u, ki wah ki la kylla jaboh namar ka jingpynhap dewiong ym dei na ka jingtih dewiong. U la ban jur ia ka jingdonkam ban don ka jaka kaba biang ban pynhap ia u dewiong khnang ban pynthikna ba ka um acid na u dewiong kan ym tuid sha ki wah.