“Ngi dei ban burom ia ka rai ki paidbah” Phah tohkit ka VPP, namar bym ioh thaw EC ha JHADC: Sniawbhalang

U Nongialam ka National People’s Party (NPP) ba long u Symbud Myntri Rangbah ka Jylla u Bah Sniawbhalang Dhar ula ong, ka jingdawa ka Voice of the People’s Party (VPP) ban phah tohkit halor ka ilekshon Jaintia Hills Autonomous District Council (JHADC) namar ka la tieng palat bym ioh thaw Executive Committee (EC).

Lah ban kdew ka VPP ha ka 16 tarik mynta u bnai ka la pynlong ka jingïalang paidbah ha Jowai bad na ka liang u President ka VPP u Bah Ardent Miller uba dei ruh u MLA ka Nongkrem constituency ula byrngem ban ujor sha ka Election Commission of India (ECI) bad kynnoh ba ki paidbah ka Rilum Jaintia Hills ki shah thombor ha ka por ilekshon JHADC.

Halor kane u Nongialam ka NPP u Bah Sniawbhalang ula ong, “Man ka ilekshon ki don la ka jong ki rukom. Ngi dei ban burom ia ka rai jong ki paidbah. Kam mut ba lada jop ka NPP ka dei ba ngi leh da ka bor lane kam mut ba lada jop ka VPP, ki leh da ka bor”.

Ula bynrap ba ym donkam iano iano ban leit sha ka ECI. “Ka tip ia la kam kamram ym donkam ban hikai ia ka ECI”.

Haba pynpaw ka jingbyrngem ka VPP ka dei ba tieng ia ka ilekshon MLA 2028, u nongialam ka NPP ula ong “Ynda ki briew ki la tieng iap tieng im, ki la sdang ban kren kulmar. Katkum ba ïohi ma nga, ha ki ilekshon ba la leit ym pat ju don kiwei ki Party ban kynnoh ba ka ilekshon ka dei ka bym khuid bad ka bym laitluid. Ngi burom ia ka rai jong ki paidbah”.

Ula ong ba ki paidbah ki la stad bad ki nang ban thep Vote bad ki Ophisar ruh ki nang, kumno ban pynlong bad pynïaid ia ki ilekshon.

“Ha KHADC ka VPP ka jop 17 ngut, hato ka dei ka ilekshon ka bym khuid bad ka bym laitluid, ngi khlem kynnoh ïa kata hynrei ngi ong, burom ia ka rai jong ki paidbah. Ka mut ha jaka ba jop VPP dei kaba khuid katba ha jaka ba rem ka dei shah thombor ki paidbah” ula buh jingkylli.