Noh synniang u Bah Sanbor ia ka Borsing Childrens Home Sohra

Ka jaka ri khunswet kaba don ha Mawsmai kaba tip kum ka Borsing Childrens Home mynta ka sngi ka la ioh pdiang bun bha ki song jingiarap kynthup naduh ki marbam, ki jain ki nep bad kumjuh ki jingpyndonkam shimet na ka kti jong u MLA ka Shillong South Bah Sanbor Shullai.

Ia kine ki song jingiarap u Bah Sanbor uba dei ruh u Mytnri sorkar ka jylla u la aiti ha u Pastor R Bareh ha ryngkat ka jingdonlang ki nongpeit ia ki heprit ha ka jingialang kaba long ha phyllaw jong ka jaka sah jong ki heprit kaba don ha Mawsmai, Sohra.

U Bah Sanbor haba kren ha ka jingialang kaba lyngkot shwa ban aiti ai kitei ki jingiarap sha ki heprit u la iathuh ba hadien ba u la wan jngoh ia ki ha u bnai ba nyngkong mynta u snem u la dep ban kular ban sa wan biagn ryngkat ki song jingiarap.

“Nga la buh jingkynmaw hynrei hapdeng ki jingbunkam ngam shym la lah ban wan ha kine ki khyndiat bnai. Nga kmen ka mynsiem ba sa shisien nga ioh ban donlang bad phi ryngkat bad kine ki jingai sngewbha,” u la ong.

U Bah Sanbor u la pyntip ba nalor ki marbam kiba man ka sngi na ka bynta ki heprit u la wanrah ruh ki jignai sngewbha kum ka nep syaid, ki jain siang, ki blanket, ki bilor um bad kiwei kiwei kiba dei na ka bynta ka jingdonkam kaba man ka sngi.

Hadien ba la ioh ia ka jingkyrpad na u Pastor ban pynioh ia ka hall ban pynlong ia ki jingai jinghikai na ka bynta ki khynnah hadien ba ki la dep matrik khnagn ba kin lah pat ban kamai bad ieng ha la ki jong ki kjat shwa ba kin mih na katei ka jaka sah, u Bah Sanbor u la ong ba un sa rah ia katei ka jingtyrwa sha u Myntri Rangbah ryngkat ka jingkular ba un pynkohnguh ia u ban shim khia.

“Kum kin eki dei hok ban ioh ia ki jingkyrshan namar lada ym don kum kine ki jaka ri shaei kine ki heprit kin leit bad mano ban ri ban sumar ia ki,” u la ong.