Nohsynniang ka KSU da ki tin bret ñiut ha Syadheh bad Syadrit

Ban wanrah ia ka khuid ka suba ha ka shnong ka thaw da ki tin bret niut synniang ka KSU Syad Unit sha ka shnong Syadheh bad Syadrit ha ka 3 tarik, Nohprah 2025. La ioh ruh ban pynlong ia ka jingialang aiti ia kitei ki tin ha iing Dorbar shnong Syadheh bad iing Dorbar shnong Syadrit ha ryngkat ka jing ia don bynta lang ki nongialam shnong bad seng Samla shnong jong baroh artylli ki Dorbar shnong. Haba ai jing kren, na ka liang u Rangbah shnong Syadheh bah Bishar Kysrian u la pynpaw ka jingsngew burom bad jingsngew nguh ia ka jingleh bha ka KSU Syad Unit ha ki por ba la dep bad u lah ai mynsiem ruh ba ka Dorbar shnong  kan dang iai treilang ryngkat bad ka KSU na ka bynta ka bha ka miat ka shnong ka thaw bad u lah pynpaw ruh ba ka Dorbar ka kloi ban nang iai ai ka kti ka mon kti ka diang ha kano kano ka por ba ka seng ka donkam jing kyrshan.

La ioh ruh ia ka jingkren na ka liang u President ka Seng Samla Shnong Syadheh u Samla Lambor Nongsiej, uba la pynpaw ruh ba ka seng samla kan iatreilang bad ka seng na ka bynta ka bha ka miat ka shnong Syad. Ka Dorbar shnong Syadrit ha ka jingia don bynta lang u Phrangsngi Kylla u ba long u adviser jong ka shnong Syadrit ryngkat ka jingiadon bynta lang u Assist Secretary Shnong u bah Shanlang Wahlang lem bad kiwei kiwei pat ki Nongialam shnong. U adviser u la pyrto ia ka KSU Syad Unit kaba ju leh ia ki kam ba bha na ka bynta ka shnong.

Na ka liang ka KSU Syad Unit hapoh ka jingialam u Samla Prosper Lyngdoh kum u President bad u Samla Philing Moksha kum u Secretary ryngkat ka jing ia synran lang ki dkhot ka Unit da kawei ka jingmut ki la pynpaw ha khmat ki nongialam shnong ba kin ia trei lang bad ka shnong bad kan iai long ruh ka kynhun ban ia kit ia bah ia ka jing eh jong ka shnong, lada ka shnong Syadheh bad Syadrit ka donkam ia ka jingiarap jong ka seng KSU. Bad sa kawei ka sur ka KSU Syad Unit ka la kular ruh ban rat diengkhong ia ki jingsniew kiba la kharoi ha ka shnong Syad hi baroh kawei khamtam ban ialeh pyrshah ia u Drok uba la suhthied ha ka ne ka thaiñ Syad hi baroh kawei.