Palat klur ioh kurup mar ki BSF ha khappud, shah kem 23 ngut ki khar Bangladesh

Ki shipai Border Security Force (BSF), ki la ïoh kurup ia ki dawai pynbuaid bad kiwei ki tiar shalan tuh ba shongdor haduh T.1,01, 22,689 klur bad la ioh kem ia 5 ngut ki nong India bad 23 ngut ki nong Bangladesh kiba donkti ha ki kam khaii tuh naduh 1-14 tarik mynta u bnai Rymphang, 2025. Ki BSF ki la kdew ia ki jingjop ba kongsan jong ka Meghalaya Frontier bad pynpaw ia ka jingshim khia ban iai peitngor ban pynthikna ia ka jingshngain ki paidbah ha khappud bad ka Bangladesh.  Ki jingjop ki kynthup ïa ka jingioh kurup ïa ki 185 tylli ki masi bad ka jingïoh kurup ïa kiwei pat ki tiar ba la khang pyrshah. Kine ki jingpyrshang la pynskhem da ka jingiatreilang bad ki tnat sorkar jylla bad Sorkar pdeng na bynta ban pynneh ia ka jingshongsuk bad ban khanglad ia ki nongkhaii beain ha khappud.

Nalor ki kam pahara ha khappud, ki BSF ki la pyni ka jingkitkhlieh na bynta ka jingbha jingmiat ki jaidbynriew ba sah ha khappud. Ha kajuh ka por, ki BSF ki la pynlong 8 tylli ki Civic Action Prokram, kynthup ban ai jingsumar ei, ki jinghikai pynroi sap ialehkai bad pynneh ia ki kolshor. Kine ki jingthmu ki don ka bynta kaba khraw ban kyntiew ia ki nongshong shnong bad kumjuh ban wanrah ka jingiajan hapdeng ki shipai BSF bad ki nongshong shnong ha khappud. Ki BSF ki la shim ha ki jingïalang ki arliang mamla ban ïakren ïa ki jingeh ba ïa dei bad ki khappud bad ban pynkhlaiñ ka jingïatreilang bad ki shipai pahara khappud jong ka Bangladesh.

Kine ki jingpyrshang ki thmu ban kyntiew ia ka jingiatreilang bad ban pynthikna ia ka jingbha jingmiat jong ki briew ha ki jaka khappud. Ka Meghalaya Frontier BSF ka dangiakhun ha ka thong ban pynthikna ia ka jingshngain ha khappud bad ban kyntiew ia ka roi ka par ki briew ha khappud.