Palat T.1000 klur ioh kurup jingdih buaid kynthup u drok Heroin ha ki 3 snem

U Myntri Rangbah ka Jylla u Conrad K Sangma hynne ka sngi ula iashimbynta ha ka jingrakhe ia ka International Day Against Drug Abuse and Illicit Trafficking kaba la pynlong ha State Convention Centre, Shillong, kaba la pynlong da ka tnad Social Welfare ha ryngkat ka jingiatreilang bad ka Meghalaya Police, Meghalaya AIDS Control Society bad ka Drug Reduction, Elimination and Action Mission (DREAM).Ha kane ka jingialang la wanrah lang ia baroh ki nongialam, ki nongtrei kiba hakhmat eh bad ia ki jaidbynriew bapher hapoh jong ka mat “Breaking the Chains: Prevention, Treatment and Recovery for All” ne “Bthat ia u Kynjri : Ka jingiada, jingsumar bad jingkoit ia baroh”.U Myntri Rangbah haba ai jingkren ula banjur ia ka jingkhlain, ka lynti ban iaid nangne shakhmat kaba don ia ka jingiohi jngai ban iakhun pyrshah ia ka jingjyllei u drok ha Meghalaya. Ula banjur ba ka sorkar ka iengskhem ym tang ban tehlakam lyngba ki bor kiba dei khmih hynrei wat ban ialam sha ka lynti jong ka jinglah ban kylla bad ban ioh ia ka jingkoit.

“Ngim lah ban peit ia kane ba ka dei tang ka kam pyntreikam ia ka ain. Ka dei ka kam kaba ktah ia ka koit ka khiah u paidbah, ka imlang sahlang bad ia ka roi ka par” ula ong bad bynrap “Ka DREAM ka dei ka mishon ka jong ngi ban iakhun lang ia kane-kum ka Jylla bad kum ki nongshong shnong” ong u Conrad.U Myntri Rangbah ula pynpaw ruh ia ki jingjop jong ka jylla lyngba ki bor ba dei khmih ha kaba ula pynpaw, ba ha kine ki 3 snem kiba la leit, ki Pulit ka Meghalaya ki la ioh kurup palat T.1000 klur ia ki jingdih pynbuaid kiba kynthup ia u Heroin, Ganja, Opium bad Crystal Meth. La don haduh 1031 tylli ki Case kiba la ujor kiba iadei bad u droks bad palat 422 la dep ban Chargesheet. Ki kynhun kiba kyrpang kum ka ANTF la nang pynkhlain shuh shuh, ki tiar kiba thymmai kum ki Drug Scanners bad la sdang ruh ia ka jingai jinghikai ia ka Canine Squads ne ki ksew kiba la pyntbit ha kaban sma.Ula kyntu ruh ia ki nongshong shnong, nonghkai, nongialam shnong, sengbhalang bad ki longiing longsem ban ia wanlang ha kane ka jingiakhun pyrshah ia u drok.

“To ngin ym ia kdew kti. To ngin ia snohkti lang. Ki samla ka Jylla kidei ka spah bah jong ngi bad ngin ym ailad ba u drok un lute noh ia ka lawei ka jong ki. Ngi ngin iakhun lang ia kane ka thma bad ngin sa ioh ia ka jingjop” ong u Myntri Rangbah.Hashwa ban pynkut ia ka jingai jingkren u Myntri Rangbah ula ialam ruh ha kaban pynbam smai kaba long kum shibynta jong ka National Nasha Mukt Bharat Abhiyan.Na ka liang u Myntri ka Tnad Social Welfare u Bah Paul Lyngdoh ula iaroh ia ka Meghalaya Police kaba la aiti ia ka Anti-Narcotics Task Force (ANTF) thik na ka bynta ban peit ha kaba iadei bad u drok bad ula pynpaw ruh ia ki kyndon kiba hapoh jongka NDPS Act na ka bynta kito ki nongkhaii kiba iai bteng ban khaii drok.Ula ong ba ka long kaba donkam ia uwei pa uwei bad ia man la ki Dorbar ban long kiba husiar bad kiba peitngor bad kiba don ia ka jingsngewlem bad kane ka jingiakhun kam dei satia hapdeng ka jong ngi pyrshah ia ki, hynrei kadei ia ngi baroh lang ban iakhun pyrshah ia u drok.Ha kane ka jingrakhe la pyndon burom ruh ia palat 20 ngut ki Recovery Champion ne ki samla kiba la jop bad lait noh na ka jingngop ha u drok bad mynta kila shakri kum ki nongtbeh jingshai ha ka imlang sahlang. Nalor kane la pynlkup burom ruh ia ka Life Care Foundation, United A’chik Society for Serving and Building the Nation, Japang NGO, A’chik Baptist Krima IV (Tura), Ka Lympung Ki Seng Kynthei bad U-Matters Multipurpose Cooperative Society kiba la noh synniang ha kaban iada, ban pynsngewthuh bad ban ai jingsumar. La pynkup burom ruh ia ki nongjop ha ki jingiakop bapher kiba ialap pyrshah ia u droks, jingiakob ialehkai phutbol, basketball, cycle rally, ka rynsan iaput iatem, ki jingiamir jingmut bad kiwei kiwei.