Palat T.5 klur ioh kurup drok ki pulit ha ki shiphew sngi: Paul Lyngdoh

U Myntri ka tnad Social Welfare u bah Paul Lyngdoh ula pyntip ha Iing Dorbar, ba tang shiphew sngi ki pulit ki la ioh kurup ki jingdih ba sniew kiba shongdor haduh T.4 Klur na Jaintia Hills bad T.1 Klur na Shillong. Haba jubab ia ka Special Motion kaba la wanrah da u MLA ka VPP na Nongkrem u Bah Ardent Basaiawmoit bad u MLA ka North Shillong u Bah Adelbert Nongrum halor ka jingma jong ka jingkiew ki nongdih droks bad ki briew kiba don ia ka jingpang HIV ha ka jylla bad ka jingshah ktah, u bah Paul ula ong ba ka sorkar ka la iakhun tyngeh ban rat dyngkhong ia ka jingkynrei u drok ha kane ka jylla. U bah Paul, ula ong ba hadien 25 snem ba la mynjur ia ka PITNDPS ha Parliament ha u snem 1988 ka sorkar Meghalaya kala pynkylla thymmai ia ki kyndon jong ka Ain bad ban pyntreikam hapoh Meghalaya.

Ula pyntip ruh ba ka sorkar kala thaw ia ki 12 tylli ki Anti-Narcotics Task Force (ANTF) Police Station hapoh ka jingkhmih jong ki Superintendents of Police ban tohkit ia ki jingjia jong ka NDPS bad PITNDPS. Katkum ka jingong u Myntri, ha kine ki 5 snem ki la don 603 tylli ki case kiba iadei bad ka NDPS kiba la dep rejistar, kila don 1069 ngut kiba la shah kem bad bun bah u jingdih pynbuaid uba la ioh ban kurup.”Ka tnad Pulit kala buh hakhmat ban pynkloi ia ki kam kiba iadei bad ka jingkurup droks. Ha ka 23 tarik u Kyllalyngkot, ia ki jingdih pynbuaid na ki 56 tylli ki case la pynduh bad pynjulor noh hapoh ka Incenerator jong ka Star Cement kaba don ha Lumshnong kaba kynthup ruh ia u cannabis, crystal meths bad ki dawai jyrhoh” ula bynrap.

Nalor kane, ula iathuh ba ka sorkar kala banjur ruh ia ka jingkongsan ban ai jaka sumar ha ki Rehab bad ka jingpynsngewthuh paidbah ha kaban iakhun ia ki jingkynrei ki jingdih kiba sniew. Kila don 12 tylli ki Rehabilitation Center kiba la don lypa hapoh ka jylla, kynthup ia kawei ka Integrated Rehabilitation Center na ka bynta kiba la ngop kaba don ha Mawdiangdiang, kaba la kyrshan da ka Ministry of Social Justice and Empowerment.