Pan kaiphod ka MHRC ba bom ia u samla haduh da jngem ha thanad Sohra

U Chairman ka Meghalaya Human Rights Commission (MHRC) uba dei u Justice ba la shongthait u T. Vaphei, u la pyntip ba ka Commission ha ka Lah sngi u Blei ka la ioh pdiang ia ka jingujor na ka kong Mildred Jyrwa halor ka jingkynnoh ba shah pynmynsaw u khun jong ka hapoh Sohra Police Station. Haba kren sha ki lad pathai khubor, u Vaiphei ula ong ba ia mynta ka Commission kan ap shwa ia ka kaiphod na u Superintendent of Police (SP) ka East Khasi Hills bad la bthah ba lada long kaba lah ba kin aiti ia ka kaiphod ha shwa ka 31 tarik Naitung, 2025. “ Hynnin ka Lah sngi u Blei ngi, la ioh pdiang ia ka jingujor bad mynta ka sngi ngi la shimkhia bad ka Commission kan sa shim ia ki sienjam shakhmat ynda la ioh pdiang ia ka kaiphod na u SP,” ong u Vaiphei.

Ula ong ba ka Commission ynda ka la ioh ia ka kaiphod kan sa iaid shakhmat ia ki kam ba kan leh. Lah ban kdew ba uwei u samla ba 19 snem ka rta na ka shnong Mawkisyiem, Sohra ula kynnoh ba pulit ka Sohra Police Station, ki la shoh tied ia u haduh ba un da jngem. Ha ka 7 tarik Naitung, ka kmie jong utei u samla, ka kong Mildred Jyrwa ka la ujor ejahar ha u Superintendent of Police (SP) ka East Khasi Hills halor ka jingkynnoh ba u khun jong ka ula shah shoh shah pynmynsaw hapoh Sohra police station.

Ha ka ejahar, ka kmie jong une u samla ba 19 snem ka rta, ka la ong ba ki pulit na Sohra Police station ki la wan wad ia u khun jong ka ha iing bad ka kmie ha ka 3 tarik Naitung,2025, ka la leit buh hi ia la u khun ha Sohra Police Station ha ka por 9 baje mynstep bad ha ka por 2 baje mynsngi, ynda ka leit ban shaw ia u khun na Police Station, ka lap ba u la mynsaw. Ka kmie jong une u samla, ka la dawa ba ki pulit kidei ban siew ia ka jinglut jingsep bad udei ban ioh ia ka jingbishar hok namar kane ka jingpynshitom jong ki pulit ia u khun jong ka, ka long ka bym lah ban pdiang haduh ba tang ba u leit shabar ruh ym lait shuh.