Paw ka jingiapher jingmut ki nongialam ka RDA

Ka United Democratic Party (UDP) bad ka Hill State People’s Democratic Party (HSPDP) ki la rai ban iaid noh ha la ka jong ka lynti ha ka jingiakhun ilekshon MDC 2025 ha ka Khasi Hills Autonomous District Council (KHADC) bad Jaintia Hills Autonomous District Council (JHADC). Ïa kane la rai ha ka jingïalang jong ka Regional Democratic Alliance (RDA) hynne ka janmiet ha ka jingdonglang baroh ki nongialam ba rangbah ka UDP bad HSPDP. Haba pynbna ïa kane u Chairman ka RDA u Bah Metbah Lyngdoh uba dei ruh u president ka UDP u la ong, “Mynta ka sngi ngi la rai ban iaid noh ha la ka jong ka lynti ha ka jingiakhun ilekshon MDC 2025 ha KHADC bad JHADC”.

U Bah Metbah ula ong, kumba ju long ha ki snem ba la dep, ka UDP bad ka HSPDP ka skhem ka jingmut ban iatreilang bad ban ïa burom mar kylliang ha ka jingiaid lynti ban poi sha ka thong ha man ki ilekshon. U la ong watla ka UDP bad ka HSPDP kan ym iatreilang ha ka ilekshon MDC 2025, hynrei kane kam mut ba ka RDA kam don shuh. “Nga kwah ban kren shai ba ka RDA ka dang don bad ka RDA kan iaid iatreilang wat hadien ka ilekshon MDC 2025” u la ong. U Chairman ka RDA u la pyntip ha ka jingïalang, la mynjur ba ka UDP ka lah ban pynieng katba ka mon ïa u/ka kyrtong ha kano kano ka Constituency bad kumjuh ka HSPDP ka lah ban pynieng katba ka mon ïa u/ka kyrtong ha kano kano ka Constituency.

Haba pynpaw ia ka jingdonkam ban iai don ka RDA u President ka UDP u la ong, “La seng ia ka RDA ym tang ban iakhun ilekshon hynrei la seng ia ka RDA ban shim khia ia ki mat ba kongsan kum ka jingdawa pyntreikam Inner Line Permit (ILP), ban pynbeit ïa u pud u sam jong ka Jylla bad ban ioh jingithuh ia ka ktien Khasi bad Garo ha ka khyrnit ba phra jong ka Riti synshar ka Ri Inda”. “Nga ban biang ba kane ka khubor ka leit na ki tyllong khubor ba paka ba ka UDP bad ka HSPDP kan iai bteng ban iatreilang ha ka lama jong ka RDA wat hadien ka ilekshon” u la ong.