Paw ka sap kyrpang ki briew ba duna dkhot met ha ka rynsan Purple Fair

Ha ka rynsan Purple Fair ba la pynlong kyrpang na ka bynta ki briew ba duna dkhot met mynta ka sngi ha Mynthong District Library Jowai, la sakhi ba ki briew ba don jingduna ha ka bor iohi ki khmat, bor ioh sngew, ka jingbym lait kren, ka jingbym lah iaid bha nalor kiwei ki jingduna, hynrei kiba kum kine ki briew ki don pat ka jinglah ba kyrpang jong ki, ia kane ka sakhi lyngba ka jingpyni jong ki ia ki sap bapher bapher ha kane ka sngi. Don napdeng kiba don jingduna kila pyni iaka sap rwai, ka sap ban tem ban put, ka sap ban shna iaki tiar ba bun jait, ban thaiñ ban suh jaiñ bad kiwei. Ka jingpyndonkam jongki ia kine ki sap ka long ruh shi bynta ka lad kamai jong ki. Haba ia dei bad ka sap jinglah kyrpang ki briew ba duna dkhot la sakhi ruh haki stall bapher bapher bala pynkhreh ha pyllaw ka District Library bala wan shim bynta daki kynhun society kiba peit bad iarap kyrpang ia kiba kum kine ki briew, kumjuh ruh ki tnat treikam sorkar.

Ia kane ka rynsan Purple Fair ha Jowai la pynlong  da ka The Composite Regional Centre for Skill Development, Rehabilitation & Empowerment of Persons with Disabilities (Divyangjan) (CRCSRE- Shillong), Meghalaya kaba hap hapoh ka administrative control of SVNIRTAR-Cuttack, Odisha, Department of Empowerment of Persons with Disabilities  (Divyangjan), Ministry of Social Justice and Empowerment, Government of India ryngkat ka jingiatreilang ki bor  District ka West Jaintia Hills District bad ka  District Social Welfare Officer, Jowai. Ia kane ka Purple Fair la wan sakhi lang ruh da u myntri thymmai ka sorkar Jylla u Wailadmiki Shylla uba dei ruh u MLA ka thaiñ, ryngkat ka jingdonlang u  Abhinav Kumar Singh, IAS, Deputy Commissioner, West Jaintia Hills, u L. Kynjing, Commissioner for Persons with Disabilities, ka kong Ripaia Passah, Assistant Commissioner for Persons with Disabilities, u Dr. Ram Shakal Sahani, Director, CRCSRE Shillong bad kiwei.

U Wailadmiki Shylla haba kren u iaroh iaka jingtrei shitom ka  CRCSRE Shillong, kaba la trei naka bynta ka Jylla baroh kawei haba iadei ban pynkupbor iaki briew ba don jingduna lada dei ki lad ai jinghikai halor ki sap ki phong jongki,  ki jaka ai jingsumar bad kiwei ki prokram kyrpang. U ong ruh ia ki briew ba kum kine ymdei ban peit iaki jingduna jongki, hynrei ithuh iaka jinglah ba kyrpang jong ki. U iaroh ruh ia ka bynta ki NGOs kiba peit ia kum kine ki briew, bad kyntu ruh ia kiba don jingduna ba kin don ka jingshaniah haka bor jinglah lade bad ban leh ia kata daka jingskhem jingmut. Nangta u kyntu ruh ia ki ban shim kabu ia ki skhim ai jingiarap bapher bapher ba lah ban ioh naka sorkar. Ha kane ka sngi la sam ruh iaki tiar ai jingiarap sha kiba duna dkhot met, kumjuh ruh ki Niramaya Health Insurance cards ba kyrpang naka bynta jongki ba ki lah ban ioh jingiarap haka pang ka shitom.