Ai k hublei u Bah Sanbor ia ki nongtrei ka MTDC

U Myntri ka Sorkar Jylla u Bah Sanbor Shullai hynne ka sngi ula iakynduh bad ban ai khublei ia baroh ki nongtrei jong ka Meghalaya Tourism Development Corporation (MTDC) ha shwa ba un mih noh na ka ophis ban leit shong noh ha ka ophis thymmai ha Secretariat hadien ba ula shah thung kum u Myntri Sorkar. U Bah Sanbor Shullai ula bat baroh shi kata kum u Chairman jong ka MTDC hynrei hadien 2 snem shiteng haba ula shah thung noh kum u Myntri Sorkar kumta ula iehnoh ia ka kam kum u Chairman ka MTDC. Hashwa ban mih noh na kane ka ophis kaba don ha State Convention Centre, Shillong u Bah Sanbor ula lum ia ka jingialang bad baroh ki ophisar bad ki nongtrei jong ka MTDC ha kaba ula ai khublei ia ki baroh kiba la ai ka jingiatreilang bad u  ha ka jingpyniaid ia ki kam jong ka Corporation.

U Bah Sanbor ual pynkynmaw ba ka dei ha ka por ka jongu kum u Chairman ka MTDC ba ula wanrah iaka Service Rules jong ki nongtrei bad ula shimkhia ban kyntiew ia ka tulop ka jongki bad ula kitbok ia ki nongtrei baroh ba kin bteng ban trei shitom bad ban ai ia ka jingshakri kaba bha tam. Ula ong ruh ba ka Garo Hills Autonomous District Council bad ka Jaintia Hills Autonomous District Council ki mad ia ka jingeh ha kaban siew ia ka tulop jong ki nongtrei hynrei ka MTDC kam shim la mad ia kano kano ka jingeh ha kaban pynbiang ia ka tulop jong ki nongtrei jongka.

“Ngan mih noh na kane ka ophis ban leit ban shong noh ha Secretariat kum u Myntri Sorkar, hynrei lada phi mad ia kano kano ka jingeh kum ki nongtrei jong ka Corporation, wan ban pynsngew sha nga bad ngan pyrshang ban iarap ia phi” la kren pynkut u Bah Sanbor shwa ban mih na ka ophis jong ka MTDC bad ka kular ba ha u Nohprah yn sa pynlong ia ka jingialehkmen lang bad ki baroh ban ia rakhe lang ia ka ‘Khristmas’.