Pdiang ka sorkar ban tohkit CBI ba bthei bom ha krem Dewiong

U Nongaiktien ka Sorkar MDA uba dei ruh u Myntri Sorkar u Bah Wailadmiki Shylla ula pynksan ka Sorkar ka kloi ban pdiang ia ki kynhun tohkit Sorkar Pdeng halor ka jing bthei bom dynamite ha krem dewiong Thangksoo Mynsngat. East Jaintia Hills kaba la shim ia ka jingim jong 31 ngut ki nongbylla ba la jia ha ka 5 tarik Rymphang.

Haba kren sha ki lad pathai khubor u Bah Wailad ula ong, ka Sorkar Jylla kam kwah ban buh rieh halor kane ka jingjia bad u Myntri Rangbah ka Jylla ula pynbna ban thung da ka Judicial Inquiry mar sien ioh jingtip ba don ka jingjia ba sngewsih ha Thangksoo Mynsngat, East Jaintia Hills.

“Ka Sorkar Jylla ka shim ka jingkitkhlieh namar kata u Myntri Rangbah mar sien ioh jingtip ba don ka jingjia ba sngewsih ha Thangksoo Mynsngat East Jaintia Hills, u pynbna syndon da ka Judicial Inquiry. Ngi pdiang lada donkam ban phah tohkit da ki kynhun tohkit Sorkar Pdeng” la ong u Bah Wailad.

U Bah Wailad u la ong ba haduh mynta ka Sorkar Jylla kam pat rai, mano ban khlieh ia ka Judicial Inquiry. “Ka Sorkar kan sa shong ban shim ia ka rai, mano ban khlieh ia ka Inquiry” u la ong.

Haba kren halor ka jingjia ha Thangksoo Mynsngat East Jaintia Hills, u Myntri Sorkar ula ïathuh ïa kaei kaba ula lap ha ka por ba u leit jurip ia ka jaka da ka ba ong, “Ka jaka ba bthei bom dynamite ha krem dewiong ka dei ka jaka ba pajih bad kaba jynjar ban leit hynrei na ka liang ka Sorkar ka ialeh shitom ban pynthikna ba kum kine ki kam tih dewiong beain kam dei shuh ban don hapoh ka Jylla”.

U Bah Wailad ula pyntip ha ka por ba u leit jurip ia ka Thangksoo Mynsngat East Jaintia Hills, u la kren ïa u Superintendent of Police bad ïa u Deputy Commissioner ban leh tyngeh ia kiba donkti ban tih dewiong beain.

Ula ïathuh ki bor District ki la kurup bun bah u dewiong, ki kali bad ki tiar ba pyndonkam ban tih dewiong beain bad kane ka paw, ba ka Sorkar ka shimkhia ban pynduh jait syndon ia ki kam beain.

“Ym tang ia ki nongbylla ne ia ki dribar, ki Pulit ki la kem ruh ia ki trai par dewiong bad ki trai jaka bad ki Pulit kin dang iai bteng ban wad lut ïa baroh kiba donkti ban tih dewiong beain” ula ong.