Phah khubor sngewlem ka President, Myntri Rangbahduh bad kiwei ia u Dr. Ricky AJ Syngkon

U Myntri Rangbahduh ka Ri u Naredra Modi bad u Myntri kam pohiing u Amit Shah bad kumjuh ka President ka Ri ka Droupadi Murmu ki la phah ka jingsngewlem sha kiba iing ha sem jong u Dr Rickey AJ Syngkon u MP ka Shillong Parliamentary  uba la khlad kyndit hynnin ka sngi Palei.

Kumjuh ka Meghalaya Pradesh Congress Committee (MPCC) ka phah ka khubor jingsngewlem sha kiba ha iing ha sem jong u MP ka Shillong Parliamentary u Ricky AJ Syngkon uba la khlad noh ha ka miet 19 tarik Rymphang.

U president ka MPCC u Bah Vincent H Pala ha ryngkat u MP ka Tura u Saleng A Sangma ki la leit jngoh ia ka longiing u Dr Ricky ban aiem ka khubor jingsngewlem.

U Bah Pala u la ong, “Ka jingaiti jong u ha ka jingshakri paidbah, ka jinglong ba jemnud jong u, bad ka jingsngewkhia jong u na ka bynta ki paidbah ba rit paid kan sah jingkynmaw.”

Ki nongialam ka Congress ki la ai ki jingduwai na ka bynta ka mynsiem jong u Dr Ricky bad ki la pynpaw ruh ia ka jingsngewlem sha ka iing ka sem, da kaba duwai ba kin ioh ia ka bor bad ka jingpyntngen ha kane ka por kaba sngewsih.

Ka MPCC ka ai ka burom ia ka jingim bad jingshakri jong u Dr Ricky da kaba kdew ba ka Party ka ithuh ia ki jingnoh synniang jong u sha ka imlang sahlang.

Ha kajuh ka por, u Vice Chancellor ka North Eastern Hill University (NEHU) u Prof PS Shukla ula pynpaw ka jingsngewsih kthang halor ka jingkhlad noh u MP ka Shillong u Dr Ricky AJ Syngkon.

Ha ka kyrwoh sngewlem, u Prof Shukla ula pynpaw ba u Bah Ricky Syngkon ula don ia ka sap ba kyrpang ha ka jingai jingshakri ia ki paidbah bad ia kiba ioh jinghikai. Kum u nongiasaid hapoh Parliament, ula rah ia ka jingangnud jong ki paidbah da ka jingkular kaba skhem, jingshlur bad da ka burom. Kum u Nonghikai ula saindur ia ka pyrkhat pyrdain jong ki samla da kaba ngam jylliew, ban long kiba hok bad iengskhem ha ka nongrim bad ban don ia ka jingsngew synei.

U la ong, ba ka jingim ka jongu ka ieng kum ka jingkieng hapdeng ka polisi bad ka jingai jinghikai bad hapdeng ka kam synshar bad ka jingbtin lynti, ka jingpynshisha ia ka bor jong ka jingkylla ka jingnang jingstad ha ka jingim paidbah.U ngeit ha ka jingiakren halor ka jingiaphiah, ka jingshakri ban ia ka jingioh myntoi shimet bad ka jingnang jingstad kum ka bor ban kiew shaphrang ka imlang sahlang.

“Ka sur jong u hapoh ka Parliament bad ka jingdon ka jongu ha ki kamra pule ka pyni ia kajuh ka jingkitkhlieh ban tei ia ka ri bad ia ka jinglong nongialam kaba kyrpang” la ong u VC ka NEHU.

Ha kawei pat ka liang, ki Samla Pule, ki nonghikai bad ki nongtrei jong ka skulbah NEHU hynne ka sngi kila pynlong ia ka jingialang sngewlem ha Multi Use Convention Hall ban ai burom ia u MP ka Shillong u Dr Ricky AJ Syngkon uba la khlad noh.

U Prof. Rajkumar Giridhari Singh, Head jongka Department of Commerce, ula pynpaw ia ka jingai jingshakri kaba 23 snem jong u Dr Syngkon ia ka skulbah bad pynpaw ia ka jingtbit ka jongu ha ka kam ban ai jinghikai bad ban tei ia ka imlang sahlang.

U Prof. Lakhon Kma, President ka NEHUTA, ula pynkynmaw ia ka por kaba ma u bad u Dr. Syngkon kila iakhun lang ha ka elekshon MP bad u Dr. Syngkon ula jop donburom bad ula iathuh ba ula phah da ka message ban ai khublei ia ka jingjop ka jongu, hynrei u Dr. Syngkon ula phone noh mardor ia u ban pynpaw ia ka jingsngewnguh bad ula banjur ban iatreilang na ka bynta ka bha ka miat jong ka skulbah, ka jylla bad ki paitbah.

U Pro Vice-Chancellor ka NEHU u Prof. Sumarbin Umdor, ula pynpaw ia ki jingsah jingkynmaw ha ka jingiadei shimet ka jongu bad u Dr. Syngkon bad ula phah ia ka jingsngewlem sha ki bahaiing bahasem bad buh jingduwai ba ka mynsiem ka jongu kan shong jahthait junom.

Ka Amoreena L. Nongpiur, kala pynpaw ba u Dr Syngkon u long u Supervisor uba tbit bha, da kaba ong, “U Supervisor uba kum u Dr Syngkon kan long kaba eh ban shem. Ka jingthylli jong ka jaka kaba ula iehnoh ka long kaba eh ban pyndap”.