Phah pynsangeh shwa ki nonghikai, nongtrei bad samla pule ban siew tulop ïa u VC ka NEHU

Ki nonghikai, nongtrei bad ki samla pule jong ka skulbah North Eastern Hill University (NEHU) ki la phah da ka dorkhas sha u Acting Vice Chancellor ka NEHU u Prof N Saha ban pynsangeh shwa ia ka jingsiew tulop ia u VC ka NEHU u Prof PS Shukla bad ia kiwei pat, naduh mynta u bnai Lber namar kim shym la wa ntrei satia wat hadien ba kila dep ban shim ia ka shuti.
Katkum ka dorkhas kaba la phah da ka North Eastern Hill University Teachers Association (NEHUTA), ka North Eastern Hill University Non Teaching Staff Association (NEHUNSA) bad ka North Eastern Hill University Students Union (NEHUSU) kila pynpaw ba dei lyngba ka jingai jingmut jong u Director ka tnad pule puthi ka sorkar pdeng ba u Prof Shukla ula shim da ka shuti (Earned Leave) naduh ka 15 tarik u Naiwieng 2024 haduh ka 2 tarik u Lber 2025, hynrei haduh mynta ym shim la wan trei ne ban wan pyntip sha ka NEHU Headquarter, Shillong hadien ba ka jingshim shuti kala kut noh.
Kane ka long ka jingpep kaba khlem sangeh na ka kam ha ka Headquarter jongka NEHU, Shillong haduh 130 sngi. Ula pynlut ia baroh ki shuti kaba u ioh na ka NEHU ha ka samoi treikam ka jongu hashwa ba yn phet krad na katei ka skulbah ha ka 1 tarik u Naiwieng. Ha kum katei ka jingjia, ki kyndon bad ki Rule bapher, kumjuh hapoh jong ka CCS(Leave) Rules, 1972, dei ban shim ia ki sienjam kiba mardor pyrshah ia u nongtrei sorkar ula ieh ia la ka kam khlem da ioh ia ka jingbit ban mih ne jah sah palat ia ka shuti kaba la ai, kumba la kdew ha ka Ministry of Personnel, Government of India kumta dei ban pyntreikam noh” la pynpaw ka NEHUTA, NEHUNSA bad NEHUSU ha ka dorkhas.
Ki la ong ruh ba ka tnad kaba dei khmih ka dei ban iengskhem ba kum kitei ki jingpep kiba khlem ioh jingbit, donkam ban shimkhia ha kaban pynshitom katkum ki kyndon ain.
“Ka NEHUTA, NEHUNSA & NEHUSU ka kwah ba phin pyntreikam hapoh jongka CCS (Leave) Rules, 1972: (a) Proviso to FR 17(1) kaba ong, u ophisar uba pep na ka kam khlem kano kano ka jingbit yn ym lah ban ioh ia ka tulop bad ia ki jingmyntoi ha ka por ba u don hapdeng ka jingpep trei. (b) FR 17-A, ka ong, haba uno uno u nongtrei shimet u pep trei khlem ka jingioh jingbit ne ieh ia ka kam ka jongu, ia katei ka por jong ka jingpep kan lam sha ka jingktah ne jingpynkhein ia ka jingshakri jong u nongtrei, sa tang lada dei ba la rai da ki bor kiba dei khmih ne ka jingshim shuti bad ka jinglah ban ialeh ia ki Departmental Examinations, ia kaba donkam tag khyndiat ia ka jingshakri. (c) Rule 25 jongka CCS Lcave Rules 1972, ka ong ba lada u nongtrei ula jah palat ia ka shuti kaba la ai da ki bor kiba dei khmih, kumta u nongtrei sorkar yn ym lah ban ioh iaka tulop halor ka jingpep ka jongu kaba khlem ioh jingbit bad ia katei ka por dei ban khate noh namar ka jingpep trei kumba ka dei ka Half Pay Leave, ka jingpep trei lada ka long shaba palat dei ban niew noh kum ka Extraodinary Leave. Ka jingpep hi nalade hadien ba kala kut noh ka sngi jong ka jingai shuti, kumta kan pynlong ia u nongtrei sorkar ban shah pynshitom” la pynpaw ha ka dorkhas.
Ki la dawa ba dei ban pyntreikam noh mardor ia kitei ki kyndn ain bad ban pynshitom noh mardor ia u Prof Shukla hapoh jongka CCS (CCA) Rules, 1965. Kumjuh dei ruh ban pynshitom hapoh jongka CCS (Leave) Rules, 1972 & CCS (CCA) Rules, 1965 ia u Registrar-Omkar Singh bad ia u Deputy Registrar u Amit Gupta kiba la pep khlem ka jingioh jingbit bad ki mshym la wan trei ne wan pyntip eiei ha ka Headquarter jongka NEHU, Shillong.
Ka NEHUTA, NEHUNSA & NEHUSU kala ong, “Ngi kyrpad ba dei ban pynsangeh ia ka jingai tulop ia u Vice Chancellor, Registrar bad ia u Deputy Registrar katkum ki kyndon ain jongka sorkar India naduh u bnai Lber 2025 bad lada ym pynsangeh ia ka jingai tulop, kumta ki ruh ki kin shim ia ka shuti Earned Leave kaba 2 sngi ban leit sha Delhi na ka jingdonkam bad kin sa sdang trei nangthie lyngba ka jingpyndonkam ia ki kor ki bor da kaba ai dawa ba ka jingim ka jongki ka don hapdeng ka jingma namar ka jingle ia ki kam bakla hapoh NEHU bad ban trei ia ka kam da kaba shu leh Online bad phin hap bansiew pat ia ka tulop ka jong ngi haduh ba ngin da rai ba ngin sa wan trei ha ka Campus katkum ka jingsngewbit ka jong ngi”.
“Ngi kyntu ruh ia baroh ki dkhot jong ka NEHUTA & NEHUNSA ban shim ia ka Earned Leave na ka bynta katto katne sngi bad ban leit shano shano bad ban wan trei da kaba pyndonka mda ki kor ki bor da kaba shu aidaw khlem da donkam ban wan sha ka jaka trei bad ban kmen pat ha kaban ioh pdiang beit ai ka tulop” la pynpaw ha ka dorkhas bad ka bynrap. “Lada phi lah ban pynjynsur ia ki kyndon ain jong ka Sorkar India na ka bynta u Vice Chancellor, Registrar bad Deputy Registrar, ia katei kajuh hi dei ban ai lang sha ki nonghikai bad ki nongtrei”.