Phah sngewlem u Conrad Ki skul Katholik kin khang, mynta yn duwai na bynta u Pope Francis

U Archbishop ka jylla niam bah Shillong u Most Rev. Victor Lyngdoh ula pynpaw ka jingsngewsih halor ka jingkhlad noh u Pope Francis, kumta la pynmih ki kyndon ban baud ryntih ia ka jingleh sngewlem baroh ki Parish bad ki jaka pule hapoh ka Archdiocese ha ki sngi sngewsih ne Mourning Period halor ka jingkhlad u Pope Francis. U Archbishop ka Shillong Archdiocese, ula kyntu ia baroh ki Father, Brother bad ki Sister ban leh burom ia u Kpa Bakhuid ba la khlad noh hynne janmiet ka sngi Nyngkong, la bthah ia ki Parish ban tied baje bad ban buh ia ka dur u Pope ha ki iingmane bad ki jaka pule, kum ka dak jingkynmaw burom.

Ula bthah ban pynlong ia ka Mass man ki Parish bad ki jaka niam na ka bynta ka jingjahthait ka mynsiem u Pope bad ula pynkynmaw ia ki lyngdoh sohblei ba ha ka Sede Vacante – ne ka por ba ka shuki u Pope ka thylli, la weng noh shwa ia ka kyrteng u Pope na ka Jingduwai Iukharist bad yn kdew tang ka kyrteng u Bishop kata ka jaka bad kane kan iai bteng tad haduh da jied bad thung thymmai ia u Pope. Katba ia ki jingduwai na ka bynta u Pope Francis dei ban kynthup ha ka jingduwai ki riewngeit ha ka Mass bad ban pynsangeh baroh tamasa lehkmen ha kum kane ka por ka jingsngewsih. La bthah ki jaka pule Catholic ha ka Shillong Archdiocese kin khang ha sngi ontep ia u Pope bad ki jaka pule ba dei ban pynbna ha la ki jong ia kane.

Halor kane la wer ia ki riewngeit sha ka Communal Prayer bad ka Requiem Mass kyrpang ha ka sngi Baar por 5:30 janmiet ha Cathedral Church ha Shillong. U Archbishop ula wer ia baroh ki nongsharai Balang bad ia ki riewngeit ban buh jingduwai na ka bynta ka jingjah thait ka mynsiem u Pope Francis. Ha kajuh ka por u Myntri Rangbah ka Jylla u Conrad K Sangma ula phah ka jingsngewlem halor ka jingkhlad noh u Pope Franacis. Ia ka khubor sngewlem ula phah lyngba u Archbishop Leopoldo Girelli, u Apostolic Nuncio sha India.