Phah tuklar ka NEHUSU bad KSU ha u Dharmendra halor ka jinglap ka Inquiry Committee

Ka seng ki samla pule ka North-Eastern Hill University Students’ Union (NEHUSU) bad ka Khasi Students’ Union (KSU) hynne ka sngi ki la pynher shithi sha u Myntri ka tnad pule puthi ka sorkar pdeng u Dharmendra Pradhan ban tuklar halor ka jinglap jong ka Inquiry Committee ba la thaw na bynta ban tohkit halor ki jingkynnoh ka jingbymtreikam bha bad ki kynrum kynram ha skulbah NEHU.“ Ngi kyntu ia u Myntri ka tnad sorkar pdeng ba un tuklar bad halor ka jinglap ka Committee ba la thaw na bynta ban tohkit ia ia ki kynrum kynram hapoh skulbah NEHU,” la ong u samla Sandy Sohtun u President ka NEHUSU. Katkum ka jingong u samla Sandy ha ka kyrwoh, kane ka Committee ka la pan por shuh shuh sa 15 sngi na bynta ban pyndep ia ka jingtohkit , hynrei haduh mynta ka 4 tarik Kyllalyngkot, 2025, ym pat shym la ioh ia kano kano ka jingpyntip haba iadei bad ka kaiphod.

“ Ngim pat shym la ioh pdiang ia kano kano ka jingpynbna ne ka jingpyntip halor ka kaiphod tohkit kane ka Committee,” ula ong.Namarkata, ka seng ki samla pule NEHU ki la kyntu ia u Myntri ka tnad pule puthi ka sorkar pdeng ban leh eiei khnang ban lah ban weng noh ia ki jingeh kiba don ha kane ka skulbah bad ban wanrah biang ia ka jingtreikam ba khuid ha kane ka skulbah.

Ha kajuh ka por, la dawa ba dei ban weng mardor ia u Prof. P.S. Shukla na ka kam kum u Vice-Chancellor ka NEHU namar kane ka skulbah hapoh ka jingialam jong u, ka la ktah ia ka pule puthi ha kane ka jylla.Ki samla pule kane ka skulbah , ki la rai ba kin nym shah shuh ia u Prof. Shukla ban rung hapoh phyllaw jong ka skulbah namar ba hapoh ka jingialam jong u, kane ka skulbah ka la hiar kyrdan ia ka pule puthi.