Plie ka MTDC ia u Mawnongrim ban tei 5-Star Hotel ha Orchid Hotel

Ka tnad kam jngohkai ka sorkar jylla bad ka Meghalaya Tourism Development Corporation (MTDC), mynta ka sngi ka la buh ia u maw nongrim na bynta ban tei pynwandur ia ka Orchid Hotel sha ka Aurika Hotel Shillong. U Myntri Rangbah ka jylla u Conrad Sangma haba kren ha kane ka sngi, ula ong ba kane ka dei ka PPP project kaba la mang ban pynlut haduh T. 124 klur da ka Lemon Tree Hotels Ltd na bynta kane ka projek.  “Kane kan dei ka five-star hotel ka ban don haduh 130 tylli ki kamra, ki kamra ba heh kum ki Banquet Hall nalor kiwei de ki ban lah ban khring ia ki briew na kylleng ka ri bad kan long ruh kum shi bynta ban kyntiew ia ka kam jngohkai ka jylla,” ong u Conrad. U la ong ban pyntyllun shakhmat ia ka jingiateh, ka Lemon Tree Hotel Limited kan siew boina T. 5 klur sha ka MTDC bad man u snem pat kan siew T. 2.5 klur kum ka bai wai.

U Myntri Rangbah u la ong ba kane ka sienjam ba la shim kam dei tang na bynta ban kyntiew ia ka kam jngohkai ha ka jylla hynrei kan iarap ruh ia ka MTDC ban don jingmih pisa na kane. Ula ong ba kum kine ki jingpynlut kam dei ba ka ai jingmyntoi tang ia ka tnad kam jngohkai hynrei kan ai jingmyntoi ia ki paidbah nongshong shnong baroh  namar lada kiew ka kam jngohkai, baroh ki paidbah ha ka imlang sahlang ki ioh jingmyntoi lang, ym dei tang ka sorkar. U Myntri ka tnad Kam Jngohkai ka jylla u bah Paul Lyngdoh ula ong ba kane kadei ka kam ba pyni ba ka sorkar ka trei na bynta  ban wanrah ka jingkylla ia ka jylla na bynta ka lawei ka pateng ban wan.

“Ka jylla Meghalaya ka la kiew bad ha u 2025 ka jylla kandei kawei na ka jylla ba bun ki nongwan jngohkai kin kham tuid ”,ula ong. Ula ban jur halor kumno ka jingdon ki karkhana jngohkai ha kane ka jylla ka la lah ban aikam sha kumba 50000 ki briew. U bah Paul Lyngdoh ula kyntu ia ka kompeni Lemon Tree Hotels Ltd ba kan pynneh ia ka kyrteng “Orchid Hotel” namar ba kadei ka kyrteng jong u syntiew ba la tip ha ka jylla Meghalaya.