Mynjur ka sorkar pdeng ia ka Umiam bad Mawkhanu kum ki jaka jngohkai

Ka Sorkar Pdeng ka la mynjur ban pyntreikam ar tylli ki projek ha Meghalaya kynthup ia ka “Development of Umiam Lake as an Iconic Tourist Center” bad ia ka MICE (Meetings, Incentives, Conferences & Exhibitions) ha Mawkhanu. Ka tnad jngohkai ka Sorkar Pdeng ka la pyntip ba kitei ar tylli ki projek ba la ioh jingmynjur ban kyntiew ia ka jylla Meghalaya kum ka ja ka jngohkai. Ka Sorkar Pdeng ka la mang T.99.27 Klur ia ka project “Development of Umiam Lake as an Iconic Tourist Center” da ka jingthmu ban thaw ia ki jaka ba heh na ka bynta ban ialehkai, pule puthi bad ban pynbyrngia bad ki longiing ba ieit ia mariang kin ioh ban lehkmen bad kiwei kiwei. Ha ka Pung Umiam yn shna kiba jingtei ba itynnad ban khring ia ki nongshangkai kynthup ia ka Craft Village, Food Court bad kiwei.

La khmih lynti na kane projek yn lah ban ai kam 1300 ngut ki samla bad kan khring ruh ia ki jingbei tyngka lyngba ka Public-Private Partnership (PPP) na bynta 4 tylli ki projek ba kot kumba T.400 Klur ka ban kynthup ia ka Music Center and Academy, Glamping, Visitor Center bad Taj Hotel. Katba ka Projek MICE ha Mawkhanu la mang ha ka jinglut kumba T.99.27 klur ban shna lynti iaid kjat, ki surok ban pyniasoh ia ki jaka ha katei ka thain, ka jaka pyninam ia ka kolshor, Sculpture Park, Public Plaza, jaka ialehkai, ka madan ban pyndonkam ha kiba bun ki liang, ka madan ban pynlong ia ki jinglehkmen, ka Amphitheater bad kiwei kiwei. Lyngba kane ka projek la khmih lynti ba kan ai kam ia ki 1300 ngut bad kan pynshlur ia ka Public-Private Partnership (PPP) na ka bynta ki 6 tylli ki projek ba shongdor T.425.25 Klur. Ka jingthmu ka long ban don ruh ia ka jaka pynbyrngia, Luxury Prefab Resort, Convention Center, Golf Club bad ka madan ialehkai Golf.

Ki projek ha Umiam bad Mawkhanu ki dei shibynta na 40 tylli ki projek ba la mynjur da ka Sorkar India ban kyntiew ia ki jaka jngohkai ha ki 23 tylli ki jylla ha ka jinglut T.3295 klur lyngba ka Special Assistance to States for Capital Investment (SASCI) – Development of Iconic Tourist Centres to Global Scale.