Plie paidbah ka Hima Sohra ia ka Green, Clean & Safe Sohra Campaign’

Shillong, Nailur :Ka Hima Sohra ha kane ka sngi Thohdieng ka la plie paidbah ia ka ‘Green, Clean & Safe Sohra Campaign’ kum shi bynta ban kyntiew ia ka kam jngohkai ha Sohra bad ban khring ia ki briew ba wankai ha kane ka thain.

Ka jingthmu jong ka Green Clean and safe Sohra campaign ka long ka thong ne ka mission ban wanrah ia ka jingkhuid kaba suba hapoh ka dong ka thain Sohra bad ka don ia ka thong ban ioh ia ka nam kaba khuid ba suba hapoh ka Jylla Meghalaya.

Ha kane ka sngi na ka liang ka hima ka la buh haduh 50 ngut ki nongialam kiba khot kum ki Tourist Assistant Team (TAT) ban peit ia ki jingkhuid jingsuba ha man ki shnong.

Ha kane ka sngi u Myntri barim ka jylla uba khmih ka tnad kam jngohkai pyrthei u bah Paul Lyngdoh, ula iaroh ia ka hima Sohra kaba la shim ia kane ka sienjam ban pynlong ia ka shnong Sohra kaba khuid ban khring ia ki paidbah nongwan jngohkai.

Ula ong ba kane kadei ka sngi ban sah kynmaw namar kadei ka lynnong kaba ka Sohra ka plie bad ka lam lynti ia kiwei ki shnong ki hima namar ba ka la pyni da ka nuksa kumno ka jingiatreilang naduh ki nongpeit, ki trai jong ki iing basa, ki nongsynshar jong ki hima bad ki nongmihkhmat.

“ Ngi iawan ryngkat bad ngi ia syrdoh lang ia ki jingkhlain ban pynlong ia ka shnong sohra kaba paw,” ula ong.

Ula pyntikna ba kine jingtrei baroh yn pynwanlang ha kawei ka lynti, khnang ba ka jingbhabriew bad ka jingitynnad ka ri Sohra kadei ban phalang ruh ha ki kam ki jingtrei bad ki jingshakri.

Ha shwa kane, ha ka jingialang ba long ha Mawkdok, ka Hima Sohra la iasoi ia ka Memorandum of Understanding (MOU) bad ka MLCU bad ka la iohpdiang ruh ia ka trok bad kiwei ki tiar na ka Polo Orchid Hotel Management bad na ka Jiva Resort.

Ha kane ka sngi, la sam ruh ia ki syrnod sha kumba 40 ngut eiei ki volunteer ne ki Tourist Assistant Team ka Hima Sohra.

Nalor u Kongsan ha kane ka sngi ladon lang ruh u MLA ka Sohra u Bah Gavin Mylliem, u Syiem ka Hima Sohra U Bah Freemansing Syiem, ka kong D.Syiem Deputy director ka tnad tourism ki Rangbah ki longkmie haduh ki Paidbah kiba la wan ha kana ka jingialang.