Plie paidbah u bah Sanbor ïa ka Traffic Booth ki pulit

U MLA ka South Shillong Constituency u Bah Sanbor Shullai hynne ka sngi, ula plie paidbah ia ka Traffic Booth jong ki pulit pyniaid kali bad ia ka painkhana paidbah haLaban Red Cross ban pynsuk ia ki paidbah kiba lei tba wan ha katei ka thain. U Bah Sanbor Shullai ula ong, ba ka jingtei ia kane ka Police Booth kadei lyngba ka Discretionary Grant kaba T.1 Lak 30,000 bad yn aiti sha ka Shillong Traffic Police ban pyndonkam bad ula ong ba la tei ia kane ka Traffic Booth, kadei namar ka jingud jong ki paidbah bad khamtam ba kane ka thain kadei kaba thnem bha kaba don ia ki jaka pule, jaka sumar bad ka iew ka hat.

Ula ong, ba mynta da ka jingdon ki pulit Traffic kin ioh ban khmih bad pyniaid ryntih ia ka jingiaid ki kali ha kane ka jaka ban kan long ka jaka kaba kin ioh ban pyndonkam haba slap ne shit kyrang ka sngi. U Bah Sanbor hadien ba ula plie ia kane ka Traffic Booth ula aiti ha u SP Traffic u K Prasad ha kaba la iadonlang ki heh pulit, u Rangbah Shnong bad ki nongialam shnong. Na ka liang u SP Traffic ula pynpaw ka jingsngenguh ia u Bah Sanbor Shullai uba la pynshna ia kane ka Traffic Booth bad ula ai khublei ruh ia ka Dorbar Shnong halor ka jingshimkhia lang na ka bynta kane ka sienjam kaban ai jingmyntoi ia ki pulit kiba pyniaid ia ki kali.

Hadien kane, u Bah Sanbor Shullai ula leit plie ia ka painkhana paidbah kaba la tei da ka Shillong Municipal Board ha ka jinglut jingsep kaba kot T.5 Lak da ka jingthmu ban pynbiang ia ka jingdonkam ki paidbah bad ki nongleit nongwan ban pyndonkam ia kane ka painkhana kaban long ruh kum ka lad ban wanrah ia khuid ka suba ha kane ka thain.