Plie u CM ïa ka ophis thymmai ka SIROBILT Software Services Pvt. Ltd

U Myntri Rangbah ka Jylla u Conrad K. Sangma hynne ka sngi Palei, ula plie ia ka ophis bathymmai jong ka SIROBILT Software Services Pvt. Ltd., kaba don ha IT Park, Mawdiangdiang. Ka SIROBILT kadei ka kompani kaba 5, ban seng ia ka jaka treikam ha Shillong Tech Park. Ka jingdon ia ka ophis treikam kaba thymmai ka pyni ia ka jingshim pura ha ka wat kaba nyngkong ha ka IT Park. Haba kren ha ka jingialang u Conrad Sagma ula ong ba ka jingdon ka SIROBILT ha ka thain ka pyni ia ka jingiaid shakhmat jong ki trai shnong halor ka kam IT bad kane ka kompani ka don ruh ia ka jingthmu ban pynrungkam sa 300 ngut ki Software Professional, da kaba thaw ia ki kabu kiba kordor na ka bynta ki samla bad ban kyntiew ia ka iohkam iohjam ha kaba iadei bad ka lain teknoloji.

U Myntri Rangbah ula ong, “Ka jingdon jong ki kynhun na ka ri bad nabar ka ri ha ka lain IT kila iarap ia ka jylla Meghalaya ban don ha ka kyrdan kaban long kum ka jaka pdeng jong ka khaii pateng ha ka liang ka teknoloji. Ka jylla ka don ia ki briew kiba la tbit bad ka sorkar kan kyrshan ia ki kam ai jingshakri lyngba ka IT, kaban plie lad ia ki samla ka jylla”.

Ula ong ruh, ba ka sorkar ka dang ialeh ban bei tyngka ha ka liang ka IT, kum shi bynta jong ka jingiohi jngai ban thaw ia ka jingpynkup bor ha ka liang ka Digital bad ban pynlong ia ki samla kiban shaniah halade ha ka ioh ka kot bad ula pyntip ruh ba ka sorkar ka kyrshan ia ki start-ups bad ia ki company kiba kloi ban kynshew tyngka ha ka lain IT.