Plie u Conrad ïa u maw nongrim ban tei ‘Indigenous Cultural Centre’ ka Seng Khasi

U Myntri Rangbah ka jylla u Conrad K. Sangma hynne ka sngi ula plie ia u maw nongrim na bynta ban tei ia ka ‘Indigenous Cultural Centre’ jong ka Seng Khasi Kmie ha Mawkhar. Ia kane ka Cultural Centre yn pyntrei lyngba ka Integrated Eco Tourism & Sustainable Agri based Livelihood Development project ka Meghalaya na ka mang tyngka jong ka Asian Development Bank (ADB). Haba kren ha kane ka sngi, u Myntri Rangbah ka jylla u Conrad ula pynpaw ia ka jingsngew kmen ba u la lah ban plie pyrda ia kane ka projek kaba la mang T. 15.37 klur.

U Myntri Rangbah ula ong ba ka jingdon jong kane ka Centre kan pynneh pynsah ia ka kolshor ka riti dustur jong ka seng Khasi bad ia ka jnglong jingman jong ka jylla baroh kawei. “Kane kan nym dei tang ka Cultural Centre bad kan nym dei tang ka museum, hynrei kan dei kawei na ka jaka kaban khring ia ki paidbah ha kaba ki samla kin lah ban ioh jingstad ha kiba bun ki liang kynthup ha ka put ka tem, ka jaka ban wan bniah nalor kiwei de,” ong u Conrad. Katba u Symbud Myntri Rangbah ka jylla u bah Prestone Tynsong ula ong ba kane ka Indigenous Cultural Centre, kan sa long kawei na ki jaka kaban ban khring ia ki nongwan jngohkai lyngba ka jingdon ki tiar pynsahnam jong ka jaidbynriew.

“ Kylleng sawdong ka pyrthei kin wan ban rung ha ka temple jong phi, nga ngeit skhem ba kan long ka jingmyntoi kaba khraw ia ka jylla Meghalaya,” ong u bah Prestone. Ha kane ka sngi la donlang u Myntri ka tnad Kam Jngohkai ka jylla u bah Paul Lyngdoh, ki Myntri ki nongialam shnong, ki nongialam jong ka Seng Khasi Kmie nalor kiwei.