Plie u Bah Prestone ïa ka ophis Ai jingshailang Village Organisation

U Symbud Myntri Rangbah ka Jylla u Bah Prestone Tynsong ha ka miet jong ka sngi Balang, ula plie ia ka ophis treikam jong ka Aijingshailang Village Organisation, Lumpengshyrngam kaba don ha ka shnong Nohwet, Pynursla Constituency. Ha kane ka jingplie ia kane ka ophis treikam kaba dang shu dep tei thymmai, la iadonlang ka MDC ka Nongshken ka Kong Grace Mary Kharprui, u Bah Rahbok Tynsong, ki nongialam bad ki dkhot jong ka Aijingshailang Village Organisation.

U Bah Prestone ula iaroh ia kane ka kynhun kaba la trei shitom ban noh synniang bad ban ai jingshakri ia ka shnong ka thaw bad u kyrmen skhem ba lyngba ka jingioh ia kane ka ophis treikam kan nang pynshlur ia ki dkhot jong ka Aijingshailang ban bteng ban trei met bad mynsiem ban kyntiew ia ka bha ka miat ha ka shnong bad ha ka imlang sahlang ha ki bynta ki bapher bapher. Nalor kane, ula kyntu ruh ia kane ka kynhun ba kadei ban bteng ban pyniar ia ka jingshakri ka jongka da kaba shim ia ka ram ne ‘Loan’ bad ban leh ia ki kam kiba lah ban long kum ka lad ban kamai kajih khnang ba kan long ka jingmyntoi ia baroh ki dkhot jong kane ka kynhun.

“Phim dei ban tieng ban shim ia ka ram haba phi don jingthmu ban trei ia kano kano ka kam, hynrei phi dei ban trei shitom lang kum ka kynhun ban ialeh ban pynmih ia ka pisa ban siew pyndep ia ka ram bad hadien ba phi lah dep ban siew khuid ia ka ram, ka jingiohnong ka jong ka kynhun kan nang kham bun shuh shuh” la ong u Bah Prestone bad ka ai nuksa ba wat ki hehspah ne hehsaipan ha ka ri India ruh, haba ki leh ne sdang ia kino kino ki kam kim ju pynlut pisa eiei nalade hynrei ki shim da ka ram ban pyniar ia ka khaii pateng ka jongki. Halor ka jingkyrpad ban ai jingiarap ban ker kynroh ia kane ka ophis treikam, na ka liang u Bah Prestone uba long u MLA ka thaiñ, ula kular ban shimkhia bad ban pynurlong noh ia katei ka jingangnud.