Plie u bah Sanbor Shullai ar tylli ki surok Dewbilat

U MLA ka Shillong South Contituency u Bah Sanbor Shullai ha ka sngi saitjain ula plie ia ar tylli ki surok dewbilat ha ka shnong Madan Laban bad ha Riatlaban Kynjat Phutbol.Ha kane ka sngi u Bah Sanbor Shullai ula plie ia ka surok dewbilat ha ka shnong Madan Laban kaba la shna ha ka jinglut kaba T.83 Lak, ha ka shnong Riatlaban Kynjatphutbol la plie ia ka surok dewbilat kaba la shna ha ka jinglut kaba kot T.57 Lak bad ia ka jaka sum bad ka jaka leit painkhana kaba la shna na ka bynta ki nongsaitjaiñ.Ha kane ka jingplie ia kine ki kam pynroi la ia donlang u Executive Engineer ka tnad PWD u Bah N Lyngdoh, ka ADC Kong D Kharmalki, ki Junior Engineer, ki ophisar na ki tnad bapher, ki nongialam shnong jong ka Madan Laban bad Riat Laban Kynjatphutbol bad kiwei kiwei.

U Bah Sanbor ula iathuh ba kine ki surok kiba la plie mynta, ha ki por kiba mynshwa kidei tang ki lynti iaid kjat hynrei da ka jingiohi jngai jong ki Dorbar Shnong la lah ban pynkylla noh ia ki sha ki surok iaid kali bad kane kadei ka jingangnud ka jong u kum u MLA ban pynpoi surok ha man la ki shnong ki thaw bad ha man la ki thiew iing.

Ula pyntip ruh ba shen yn sa sdang noh ban shna ha ka wat ka baa ria ka surok ha ka shnong Riat Laban bad la khmih lynti ba ki kam ki jam kin sa sdang noh ha u Nailur bad yn sa shna noh ia ka Cultural Centre kaban don lang naduh ka jaka ieng kali, ka jaka pynlong jingialang bad ka ophis treikam jong ka Dorbar Shnong, Seng Samla bad Seng Longkmie.Ha kane ka sngi u Bah Sanbor ula pynpaw ba u sngewjan bha ia ka shnong Riatlaban Kynjatphutbol, namar ha ka por ba u dang long kum u President ka seng FKJGP Laban Circle, ki riew rangbah kila pynbor ia u ban iakhun noh ia ka elekshon MDC bad kumta ba dei ha kane ka shnong ula kylla long u nongmihkhmat paidbah kum u MDC bad MLA ka thain.