Plie u Myntri 30 tylli ki ‘Eri Silk Spinning Centre’ ha Umkynsier ka jingmyntoi ia ki paidbah

Ban kyntiew ia ka kam thaiñ jaiñ ha Ri Bhoi District bad kumjuh ban plie lad ai kam ai jam ia ki paidbah mynta ka sngi u Myntri ka tnad Community and Rural Development (C&RD) u Bah Sosthenes Sohtun ula plie ia 30 tylli ki Eri Silk Spinning Centre ha ryngkat ki kor thir ksai ha shnong Umkynsier, Ri Bhoi District. Ia ka jingpynbna ban plie paidbah ia ki 30 tylli ki Eri Silk Spinning Centre, la pynbna lyngba ka jingplie ia kawei ka Eri Silk Spinning Centre ha ka shnong Umkynsier ba hap hapoh ka Jirang C&RD Block ha ka 13 tarik u Naiwieng, ha kaba la pynbit pynbiang lyngba ki bor District ka Ri Bhoi ha ka jingiatreilang bad ka Meghalaya State Rural Livelihoods Society (MSRLS) bad kyrshan da ka Indian Oil Corporation Limited (IOCL) lyngba ka CSR project.

Ha kane ka sngi ban sah jingkynmaw na bynta ki nongthaiñ jaiñ ha ka shnong Umkynsier, la sakhi lang da ka jingiadonlang da u Abhilash Baranwal, Deputy Commisioner ka Ri Bhoi District, u Mukesh Ranjan, Executive Director ka IOCL, u Bah Raja Brahma, Project Director, u Dr. Hajong, BDO Jirang Block, ki riew rangbah ka thain, ki longkmie na ka shnong Umkynsier lem bad kiwei. Haba kren ha jingialang u Bah Sosthenes Sohtun kum u nongmihkhmat ka Jirang Constituency bad kum u Myntri ka Tnad C&RD ula ai ka jingiaroh ia ka ophis u Deputy Commisioner lem ka tnad MSRLS bad ka IOCL kiba la shimkhia ban pynurlong ia ka jingangnud ban kyntiew ia ka kam thaiñ jaiñ ban pynmih shuh shuh ia u ksai ryndia lyngba kine ki Eri Silk Spinning Centre ki ban pynmyntoi ia ki nongshong shnong ha ki Shnong nongkyndong khamtam kum ka lad ban ai kam ai jam ia ki longkmie kiba dei ki paia ba khraw ha ka kam thaiñ jaiñ.

U la kdew ruh, ba ka them Ri Bhoi District ka dei kawei na ki thaiñ hapoh ka jylla ka lah ban pynmih shibun ki jaiñ ba shu thaiñ da ki ksai ryndia bad ka jinglah ban pynmih ia u ksai ryndia kumta lyngba kum kine ki skhim ne ki lad jingiarap lyngba ki bor sorkar bad ki kompani bapher bapher kan plie lad bad ai mynsiem bad ban kyntiew shi kat dei ia ki nongthaiñ kiba im jakpoh na kane ka kam thaiñ jaiñ.